बिबट्याची दहशत : शेतकऱ्याने स्वतःच पेटवून तोडला ऊस
शिराळा : तालुक्यातील उपवळे परिसरात बिबट्याचा वावर आणि अलीकडेच एका नऊवर्षीय बालिकेवर झालेल्या हल्ल्यामुळे ऊसतोड मजुरांमध्ये प्रचंड भीती पसरली आहे. मजुरांनी ऊस तोडण्यास नकार दिल्याने, अखेर ऊस शेतातच राहू नये म्हणून शेतकरी दिलीप पाटील यांना आपला उभा ऊस पेटवून तोडण्याची दुर्दैवी वेळ आली. या घटनेमुळे परिसरात भीतीचे वातावरण असून वनविभागाने बिबट्याचा बंदोबस्त करावा, अशी मागणी ग्रामस्थांनी केली आहे
बिबट्याचा हल्ला: बुधवारी रात्री भरवस्तीत हनुमान मंदिराजवळ एका बालिकेवर बिबट्याने हल्ला करून तिला जखमी केले. या घटनेमुळे ‘दालमिया शुगर’सह अन्य कारखान्यांच्या मजुरांनी काम बंद करून गाव सोडण्याची तयारी दर्शवली होती.
- मजुरांची समजूत काढण्याचे प्रयत्न: शेतकरी दिलीप पाटील आणि कारखान्याच्या गटप्रमुखांनी मजुरांना राहण्यासाठी सुरक्षित शेड उपलब्ध करून दिले. मात्र, उसाच्या दाट पालापाचोळ्यात बिबट्या दबा धरून बसण्याची भीती असल्याने मजुरांनी तोडणीस नकार दिला.
- शेतकऱ्याची हतबलता: १८ महिने कष्टाने वाढवलेला ऊस डोळ्यांदेखत पेटवण्याशिवाय शेतकऱ्याकडे दुसरा पर्याय उरला नाही. ऊस पेटवल्यामुळे पाला जळून गेला आणि मोकळ्या जागेत बिबट्याची भीती कमी झाल्याने मजुरांनी तोडणी सुरू केली.
- दुहेरी संकट: अतिवृष्टीमुळे यंदा हंगाम आधीच महिनाभर उशिरा सुरू झाला आहे. त्यातच मजूर टंचाई आणि आता बिबट्याच्या दहशतीमुळे ऊस उत्पादक शेतकरी मोठ्या संकटात सापडला आहे.
