ऊस नोंद कारणावरून कृषी साहाय्यकावर जीवघेणा हल्ला

अंबाजोगाई परिसरात खळबळ

अंबाजोगाई: एकीकडे गाळप हंगाम अंतिम टप्प्यात येत असताना, उसाच्या नोंदीवरून ग्रामीण भागात वादाचे प्रकार वाढू लागले आहेत. अशीच एक धक्कादायक घटना अंबाजोगाई तालुक्यातील अकोला येथे समोर आली असून, ऊस कारखान्यातील नोंदीच्या कारणावरून एका कृषी साहाय्यकावर कोयत्याने प्राणघातक हल्ला करण्यात आला आहे. या हल्ल्यात संबंधित कर्मचारी गंभीर जखमी झाला असून, त्यांच्यावर उपचार सुरू आहेत.

नेमकी घटना काय?

विनोद कैलास आगळे हे लातूर येथील एका साखर कारखान्यात कृषी साहाय्यक म्हणून कार्यरत आहेत. गुरुवारी रात्री ते आपल्या अकोला येथील घरी विश्रांती घेत असताना, गावातीलच बाळासाहेब बब्रुवान आगळे हा त्यांच्या घरी आला. “माझ्या उसाची कारखान्यावर लवकर नोंद का घेतली नाहीस?” आणि “माझा ऊस लवकर का जात नाही?” असा जाब विचारत बाळासाहेबने विनोद यांच्याशी हुज्जत घालण्यास सुरुवात केली.

वादाचे रूपांतर हाणामारीत
सुरुवातीला शाब्दिक असलेला हा वाद काही वेळातच विकोपाला गेला. रागाच्या भरात असलेल्या आरोपीने जवळ असलेला कोयता काढून विनोद आगळे यांच्या कपाळावर जोरदार वार केला. हा वार इतका भीषण होता की विनोद रक्ताच्या थारोळ्यात कोसळले. पतीला वाचवण्यासाठी त्यांच्या पत्नी मध्यस्थी करायला आल्या असता, आरोपीने त्यांनाही धक्काबुक्की करत जखमी केले. या घटनेनंतर आरडाओरडा झाल्याने परिसरातील नागरिक जमू लागताच आरोपीने तेथून पळ काढला.

पोलिस कारवाई आणि तपास
घटनेची माहिती मिळताच अंबाजोगाई ग्रामीण पोलिसांनी घटनास्थळी धाव घेतली. जखमी विनोद आगळे यांना तात्काळ रुग्णालयात दाखल करण्यात आले आहे. याप्रकरणी अंबाजोगाई ग्रामीण पोलिसांनी बाळासाहेब आगळेविरुद्ध विविध कलमान्वये गुन्हा दाखल केला असून, त्याचा शोध सुरू आहे.

कर्मचाऱ्यांमध्ये भीतीचे वातावरण
कर्तव्य बजावणाऱ्या कर्मचाऱ्यावर अशा प्रकारे भरवस्तीत आणि घरात शिरून हल्ला झाल्याने साखर कारखाना कर्मचारी आणि कृषी विभागाच्या कर्मचाऱ्यांमध्ये भीतीचे वातावरण पसरले आहे. ऊस गाळप हंगामात नोंदीवरून होणारे वाद मिटवण्यासाठी प्रशासनाने ठोस पावले उचलावीत, अशी मागणी आता जोर धरू लागली आहे.