आणखी ९ कारखान्यांनी थकबाकी भरली, तरीही ६९७ कोटींची FRP बाकी
८३ कारखान्यांनी शेतकऱ्यांना पूर्ण पैसे दिले नाहीत; २० कारखान्यांवर ‘आरआरसी’ची कारवाई
पुणे: राज्यातील ऊस उत्पादक शेतकऱ्यांसाठी चिंताजनक बातमी समोर आली असून, साखर कारखान्यांनी गाळप केलेल्या उसाचे पैसे पूर्णपणे अदा केलेले नाहीत. महाराष्ट्र राज्य साखर आयुक्तालयाने ३१ मे २०२५ पर्यंतच्या आकडेवारीसह सादर केलेल्या अहवालानुसार, साखर कारखान्यांकडे शेतकऱ्यांची एकूण ६९७ कोटी रुपयांची ऊस एफआरपी थकबाकी शिल्लक आहे.
राज्यातील एकूण २०० गाळप करणाऱ्या कारखान्यांपैकी तब्बल ८३ कारखान्यांनी अद्याप शेतकऱ्यांना १००% पैसे दिलेले नाहीत .
साखर आयुक्तालयाच्या अहवालानुसार, २०२४-२५ हंगामात १५ मे २०२५ पर्यंत राज्यात ८५४.५० लाख मेट्रिक टन उसाचे गाळप झाले. या उसाची तोडणी आणि वाहतूक खर्चासह एकूण देय एफआरपी ३१५८७ कोटी रुपये होती. कारखान्यांनी ३१८४६ कोटी रुपये अदा केले असले तरी, प्रत्यक्ष थकबाकीचा आकडा ६९७ कोटी रुपयांवर पोहोचला आहे. एकूण देय एफआरपीच्या तुलनेत ९७.७९% भरणा झाला असल्याचे अहवालात नमूद आहे .
एफआरपी भरणा केलेल्या कारखान्यांची सद्यस्थिती पाहता :
- ११७ कारखान्यांनी शेतकऱ्यांची १००% एफआरपी दिली आहे .
- परंतु, ७५ कारखान्यांनी ८० ते ९९.९९%, ३ कारखान्यांनी ६० ते ७९.९९% तर ५ कारखान्यांनी ५९.९९% पेक्षा कमी एफआरपी अदा केली आहे .
- या आकडेवारीनुसार, ८३ कारखान्यांकडे एफआरपीची थकबाकी प्रलंबित आहे .
शेतकऱ्यांचे पैसे थकवणाऱ्या कारखान्यांवर साखर आयुक्तालयाने कारवाईचा बडगा उगारला असून, २० थकबाकीदार कारखान्यांविरुद्ध महसूल वसुली प्रमाणपत्र (आर.आर.सी.) जारी करण्यात आले आहे . या हंगामातील थकबाकीबरोबरच, मागील हंगामातील (२०२३-२४ आणि त्यापूर्वीची) ७३.१३६७ कोटी रुपयांची थकबाकी देखील अजूनही प्रलंबित असल्याचे अहवालात म्हटले आहे.
कारखान्यांनी तातडीने थकीत एफआरपीची रक्कम शेतकऱ्यांच्या खात्यावर जमा करावी, अशी मागणी शेतकरी संघटनांकडून केली जात आहे. अन्यथा तीव्र आंदोलन छेडण्याचा इशाराही देण्यात येत आहे. साखर आयुक्तालयाच्या या आकडेवारीमुळे राज्यातील हजारो ऊस उत्पादक शेतकरी अजूनही आपल्या हक्काच्या पैशांच्या प्रतीक्षेत असल्याचे स्पष्ट झाले आहे.
