अतिउत्साही संचालकांना अजित पवारांचा कडक इशारा
बारामती : सहकारी साखर कारखान्यांमधील वाढत्या अंतर्गत राजकारणावरून उपमुख्यमंत्री अजित पवार यांनी संचालकांचे कान टोचले आहेत. “कारखान्याचे अधिकारी हे आपले सालगडी नाहीत, हे संचालकांनी लक्षात ठेवावे,” अशा कडक शब्दांत पवारांनी माळेगावसह इतर कारखान्यांमधील अतिउत्साही संचालकांना तंबी दिली आहे. दरम्यान, या संदर्भात अजित पवार लवकरच एक विशेष बैठक घेणार असून, कारखान्यातील पदाधिकाऱ्यांनी समन्वयाने काम करावे, असे आवाहन त्यांनी केले आहे.
अधिकाऱ्यांचा सन्मान राखा
माळेगाव कारखान्यात काही संचालक अधिकाऱ्यांना विनाकारण धारेवर धरत असल्याच्या तक्रारी पवारांकडे आल्या होत्या. त्यावर बोलताना ते म्हणाले की, जर अधिकारी चुकत असतील तर अध्यक्षांकडे तक्रार करा, स्वतः कायदा हातात घेऊ नका. आजच्या स्पर्धेच्या युगात अधिकारी सोडून गेले, तर कारखान्याचे नुकसान होईल.
- गाळप आणि स्पर्धा: बारामतीमधील सोमेश्वर, माळेगाव आणि छत्रपती या तिन्ही कारखान्यांचे गाळप जोमाने सुरू आहे. सोमेश्वरने साखर उताऱ्यात माळेगावला मागे टाकले असून, ही स्पर्धा निकोप असल्याचे त्यांनी नमूद केले.
- आर्थिक यश: इन्कम टॅक्सच्या जटील प्रश्नातून मार्ग काढत माळेगाव कारखान्याचे साडेतीन कोटी रुपये परत मिळवून दिल्याचे पवारांनी सांगितले.
- शेतकऱ्यांचा विश्वास: अनेक खासगी कारखान्यांनी क्षमता वाढवली असली, तरी केवळ चांगल्या दराच्या परंपरेमुळे शेतकरी आजही सहकारी कारखान्यांनाच पसंती देत आहेत, असा विश्वास त्यांनी व्यक्त केला.
