पंचगंगा कारखान्याच्या चेअरमनपदी पी. एम. पाटील

इचलकरंजी (गंगानगर): हातकणंगले तालुक्यातील ‘देशभक्त रत्नाप्पाण्णा कुंभार पंचगंगा सहकारी साखर कारखान्या’च्या अध्यक्ष आणि उपाध्यक्ष निवडीची प्रक्रिया नुकतीच पार पडली. यामध्ये चेअरमनपदी कबनूरचे पी. एम. पाटील आणि व्हाईस चेअरमनपदी शिरोळचे प्रताप ऊर्फ बाबा पाटील यांची बिनविरोध निवड करण्यात आली आहे. या निवडीमुळे पंचगंगा कारखान्याच्या पुढील कामकाजाला नवीन गती मिळण्याची अपेक्षा व्यक्त केली जात आहे.

निवडीची घोषणा होताच समर्थकांनी कारखाना कार्यस्थळावर गुलालाची उधळण आणि फटाक्यांची आतिषबाजी करत जल्लोष केला.

बिनविरोध निवड: जिल्हाधिकारी तथा निवडणूक अधिकारी अमोल येडगे यांच्या अध्यक्षतेखाली ही प्रक्रिया पार पडली. दोन्ही पदांसाठी प्रत्येकी एकच अर्ज आल्याने ही निवड बिनविरोध झाली.

• प्रशासकीय मान्यता: सहकार निवडणूक प्राधिकरणाने १९ ‘एन’ फॉर्मनुसार या निवडीवर शुक्रवारी अधिकृत शिक्कामोर्तब केले.