कृष्णा कारखान्यात विभाग प्रमुखांसाठी प्रशिक्षण शिबिर

कराड :  महाराष्ट्र सहकार विकास महामंडळ (एमसीडीसी) आणि प्रादेशिक साखर सहसंचालक यांच्या संयुक्त विद्यमाने यशवंतराव मोहिते कृष्णा सहकारी साखर कारखान्यातील पदाधिकारी व विभाग प्रमुख यांच्यासाठी एकदिवसीय प्रशिक्षण नुकतेच आयोजित करण्यात आले. कार्यक्रमाच्या अध्यक्षस्थानी चेअरमन डॉ. सुरेश भोसले होते. जयवंतराव भोसले कृष्णा कृषी महाविद्यालयात हे प्रशिक्षण शिबिर झाले.

शेतकऱ्यांचे हित केंद्रस्थानी ठेवून कृष्णा साखर कारखाना उत्कृष्टपणे वाटचाल करत आहे. सहकारातील एक आदर्शवत कारखाना म्हणून कृष्णा सहकारी साखर कारखान्याचा नावलौकिक आहे. असे प्रतिपादन पुणे प्रादेशिक साखर सहसंचालक श्रीमती नीलिमा गायकवाड यांनी यावेळी केले.

यावेळी महाराष्ट्र सहकार विकास महामंडळाचे विभागीय व्यवस्थापकीय संचालक मंगेश तिटकारे, विभागीय समन्वयक अरुण काकडे, कारखान्याचे व्हाईस चेअरमन जगदीश जगताप, कोल्हापूर येथील जिल्हा उपनिबंधक कार्यालयाचे सहकार अधिकारी डॉ.एम. ए. मुरूडकर, सनदी लेखापाल धीरज देशपांडे, निलेश निकम, श्रीधर कोल्हापूरे, डॉ. राजन पडवळ, कारखान्याचे सर्व संचालक, एक्झिक्युटिव्ह डायरेक्टर सी.एन देशपांडे, मॅनेजिंग डायरेक्टर बाजीराव सुतार उपस्थित होते.

गायकवाड पुढे म्हणाल्या, आधुनिक तंत्रज्ञानाचा वापर, पारदर्शक कारभार आणि शाश्वत विकासाच्या दृष्टिकोनातून विविध शेतकरी कल्याणकारी उपक्रम राबवून कृष्णा कारखान्याने राज्यातील सहकार क्षेत्रात आपली विशिष्ट ओळख निर्माण केली आहे. कारखान्याच्या पदाधिकारी व विभागप्रमुख यांना अधिक प्रशिक्षित करण्यासाठी प्रशिक्षण शिबिराचे आयोजन करण्यात आले आहे. याचा लाभ कारखान्याच्या पुढील वाटचालीसाठी निश्चितच होईल.

चेअरमन डॉ. सुरेश भोसले म्हणाले, ग्रामीण जीवन सहकारावर अवलंबून आहे. स्वातंत्र्यानंतर खऱ्या अर्थाने सहकाराला चालना मिळाली. सहकार आपल्या देशाला पुढे घेऊन जाऊ शकतो. सहकारात काम करताना प्रशिक्षण महत्वाचे आहे. त्या दृष्टीने हे एकदिवसीय प्रशिक्षण स्तुत्य उपक्रम आहे. बाजीराव सुतार यांनी स्वागत केले आणि शेवटी आभार मानले. अरुण काकडे यांनी प्रास्ताविक केले. सेक्रेटरी सिध्देश्वर शिलवंत यांनी सूत्रसंचालन केले.