महाराष्ट्र राज्य ऊस उत्पादक संघाची 28 फेब्रु. रोजी १२ वी ऊस परिषद

सांगली – महाराष्ट्र राज्य ऊस उत्पादक संघ व मासिक ऊस संदेश आयोजित राज्यस्तरीय ” १२ वी ऊस परिषद” शुक्रवार दिनांक २८/०२/२०२५ रोजी सकाळी ११.०० वाजता जनाई गार्डन, पेट, शिराळ रोड, पेठ, ता. वाळवा, जि. सांगली येथे आयोजित करण्यात आल्याची माहिती महाराष्ट्र राज्य ऊस उत्पादक संघाच्या परिषद संयोजक समितीचे अध्यक्ष युवराज पाटील यांनी पत्रकार परिषदेत दिली.

सदर ऊस परिषदेत महाराष्ट्रातील ऊस शेतीचे आजचे चित्र सर्वांच्या नजरेसमोर आहे. ऊस शेती करणारे शेतकऱ्यांची स्थिती बरीचशी नाजूक झाली असून ऊस शेतीमधील समस्या वाढत आहेत. या समस्यांवर उपाययोजना करण्यासाठी ऊस शेतीतील विचारवंत आणि ऊस शेतीशी पुरक उद्योजकांनी एकत्रित येवून या परिस्थितीवर योग्य चर्चा करून त्याचे कारण शोधून त्याच्यावर ठोस उपाययोजना सुचविण्याची गरज निर्माण झाली असून या गरजेची पुर्तता करण्यासाठीच महाराष्ट्र राज्य ऊस उत्पादक संघाने राज्यस्तरीय ऊस विकास परिषदेचे आयोजन केलेले आहे.

परिषदेचे उद्घाटक रघुनाथदादा पाटील (शेतकरी नेते), कार्यक्रमाचे अध्यक्ष किरणभाऊ चव्हाण (केळी उत्पादक शेतकरी संघ संस्थापक अध्यक्ष) व मुख्य मार्गदर्शक अतुलनाना माने पाटील (संस्थापक अध्यक्ष महाराष्ट्र राज्य ऊस उत्पादक संघ) आदी मान्यवरांची परिषदेला उपस्थिती लाभणार आहे..

या ऊस परिषदेत आधुनिक ऊसपिक तंत्रज्ञान विषयाचे मार्गदर्शन करण्यात येणार असून सुरेश उबाळे, ऊस पैदासकार, पाडेगाव ऊस संशोधन केंद्र हे उद्दीष्ट एकरी १०० टनाचे या विषयावर मार्गदर्शन करणार आहेत, तसेच शामकांत पाटील, जैन एरिगेशन लि. चे महाराष्ट्र प्रमुख हे ऊस पीक पाणी व्यवस्थापन या विषयावर मार्गदर्शन करणार आहेत.

महेंद्र घाटगे , राज्य तज्ञ संचालक ऊस संघ हे खत व्यवस्थापन या विषयावर मार्गदर्शन करणार आहेत, तसेच अनंत निकम, माजी कार्यकारी संचालक साखर कारखाना हे ऊस विकास योजना राबवणे आज गरज या विषयावर मार्गदर्शन करणार आहेत.

परिषदेस प्रमुख उपस्थिती म्हणून विवेक कुंभार (जिल्हा कृषी अधिक्षक अधिकारी सांगली), नामदेव परीट (जिल्हा कृषी उपसंचालक, कोल्हापूर), संजय बुवा (कृषी अधिकारी पंचायत समिती वाळवा), सचिन पाटील (राज्य उपाध्यक्ष ऊस संघ), अशिष पाटील (राज्य संचालक, ऊस संघ) हे उपस्थित राहणार आहेत.

तरी सर्व ऊस उत्पादक शेतकऱ्यांनी वरील ऊस परिषदेस उपस्थित राहून लाभ घ्यावा, असे आवाहन संघाचे संस्थापक अध्यक्ष अतुलनाना माने पाटील यांनी केले. यावेळो पत्रकार परिषदेसाठी समीर शेख, युवराज पाटील, अमर पाटील, महेंद्र घाटगे, विकास पाटील इ. उपस्थित होते.