‘वारणा’कडून बुलेट गाडी आणि विदेशवारीचे बक्षीस

कोल्हापूर : मार्चसाठी ऊस नोंद करून मार्चमध्येच ऊस गळीतास पाठविणाऱ्या ‘भाग्यवंत’ शेतकऱ्यांना बुलेट मोटरसायकल बक्षीस आणि परदेश दौऱ्याची संधी मिळेल, अशी घोषणा वारणा सहकारी साखर कारखान्याचे अध्यक्ष आमदार विनय कोरे यांनी वार्षिक सर्वसाधारण सभेत केली.

वारणानगर येथील श्री तात्यासाहेब कोरे वारणा सहकारी साखर कारखान्याची ६७ वी वार्षिक सभा ३ रोजी पार पडली. यावेळी अनेक निर्णयांना आणि प्रस्तावांना एकमताने मंजुरी देण्यात आली. मार्च महिन्यात कारखान्यास ५० टन ऊस पुरवठा करणारे शेतकरी बुलेट मोटारसायकलसाठी पात्र असतील. तर, मार्च महिन्यातच ३० टन ऊस पुरवठा करणारे शेतकरी विदेशवारी साठी पात्र असतील. शेतकऱ्यांची निवड लकी ड्रॉतून केली जाईल, असे कोरे यांनी जाहीर केले.

आणखी काही गावांचा समावेश करून वारणा कारखाना कार्यक्षेत्रात वाढ करण्याचा तसेच सहकारी साखर कारखान्यांची प्राप्ती करातून मुक्तता करण्याचा निर्णय घेतल्याबद्दल केंदीय सहकार मंत्री अमित शहा यांचा आणि चांद्रयान मोहिमेबद्दल इस्त्रोच्या शास्त्रज्ञांच्या अभिनंदनाचा ठरावदेखील सभेत करण्यात आला.

यावर्षीच्या ऊस क्षेत्र व उत्पादन तसेच जागतिक पातळीवरील साखर उद्योगाची स्थिती याचा कोरे यानी सविस्तर आढावा घेऊन शेतकऱ्यानी सर्व ऊस वारणेस गळीतास १०० टक्के पाठवून ऊसविकास योजनेतुन पाणंदी विकास आदी योजनांचाही लाभ घ्यावा, असे आवाहन त्यांनी केले.

संयुक्त शेयर्स स्वतंत्र करण्याचा तसेच १५ ते २८ फेब्रुवारीमध्ये गळीतास येणाऱ्या उसास १०० रु, १ ते १५ मार्च मध्ये २०० रु,तर १५ मार्चनंतर येणाऱ्या ऊसास ३५० रुपयांप्रमाणे जादा दर देण्यात येईल. ऊसाच्या नवीन जातीसाठी संशोधन,नोंद करून मार्चमध्ये गळीतास येणाऱ्या ऊसउत्पादकासाठी लकी ड्रॉ योजना, साखर निर्यात धोरण आदीबाबत त्यांनी सविस्तर माहिती सांगितली. तर जयशिवराय किसान संघटनेचे अध्यक्ष शिवाजीराव माने यांनी अहवालातील काही मुद्दयावर उपस्थित केलेल्या प्रश्नांचा डॉ.कोरे यांनी खुलासा केला.
यावेळी उसभुषण पुरस्कार प्राप्त पाडळीचे राजाराम महादेव जाधव, यांच्यासह १०० टक्के उसपुरवठा करणाऱ्या बहिरेवाडी, केखले व मनपाडळे या गावातील शेतकऱ्यांचा प्रातिनिधिक स्वरूपात आणि सातत्याने तोडणी वाहतूक करणारे वाहन व बैलगाडी मालकांचा सत्कार करण्यात आला.
वारणा समुहातील विविध संस्थांचे पदाधिकारी, संचालक मंडळ यांच्यासह व मोठ्या संख्येनी सभासदांच्या उपस्थितीत खेळीमेळीच्या वातावरणात पार पडलेल्या या सभेची सुरुवात वारणा वाद्यवृंदाच्या सहकार गीताने झाले.सेक्रेटरी बी.बी.दोशिंगे यांनी श्रध्दांजली ठरावाचे वाचन केले.कार्यकारी संचालक शहाजी भगत यांनी नोटीस व विषय वाचन केले.उपाध्यक्ष प्रतापराव पाटील यांनी आभार मानले तर प्रा.पी. बी.बंडगर व प्रा.नामदेव चोपडे यांनी सूत्रसंचलन केले.