महाराष्ट्राला दहा पुरस्कार, शाहू कारखाना देशात सर्वोत्कृष्ट

राष्ट्रीय सहकारी साखर कारखाना महासंघाचे पुरस्कार जाहीर

नवी दिल्ली : राष्ट्रीय सहकारी साखर कारखाना महासंघाने (२०२१-२२) च्या पुरस्कारांची घोषणा केली आहे. कागलचा श्री छत्रपती शाहू सहकारी साखर कारखाना देशात सर्वोत्कृष्ट ठरला असून, त्यास वसंतदादा पाटील पारितोषिक जाहीर झाले आहे.

एकूण २१ पुरस्कार राष्ट्रीय सहकारी साखर कारखाना महासंघाचे अध्यक्ष जयप्रकाश दांडेगावकर यांनी काल जाहीर केली. या वेळी महासंघाचे व्यवस्थापकीय संचालक प्रकाश नाईकनवरे उपस्थित होते. महाराष्ट्राने दहा पुरस्कारासह प्रथम क्रमांक पटकाविला. दुसऱ्या क्रमांकावरील उत्तर प्रदेश व तमिळनाडूला प्रत्येकी तीन पुरस्कार प्राप्त झाले आहेत.

गुजरात आणि हरियाणा या राज्यानी प्रत्येकी दोन पारितोषिके मिळविली. तर मध्य प्रदेशाला एक पुरस्कार मिळाला . उच्च साखर उतारा (किमान सरासरी १० टक्के) असणाऱ्या राज्यात महाराष्ट्र, कर्नाटक, गुजरात यातील साखर कारखान्यांचा सहभाग होता.

‘एका कारखान्याला एकच पुरस्कार’ असे धोरण ठरविण्यात आले होते. नवी दिल्ली येथे होणाऱ्या एका विशेष समारंभात पुरस्कार प्रदान करण्यात येणार आहेत.

थोरात कारखान्याला उत्कृष्ट ऊस विकास पुरस्कार

सहकारमहर्षी भाऊसाहेब थोरात सहकारी साखर कारखान्याला उत्कृष्ट ऊस विकास हा राष्ट्रीय पातळीवरील पुरस्कार जाहीर झाला आहे. कारखान्याच्या शिरपेचात आणखी एक मानाचा तुरा रोवला असल्याची माहिती कारखान्याचे अध्यक्ष प्रतापराव ओहोळ यांनी दिली.

ओहोळ म्हणाले, माजी मंत्री तथा आमदार बाळासाहेब थोरात यांच्या मार्गदर्शनाखाली थोरात कारखान्याने कायम सभासद, ऊस उत्पादक व कामगारांचे हित जोपासताना अन्य कारखाने व सहकारी संस्थांसाठी दिशादर्शक काम केले. कारखान्याने गत हंगामात १५ लाख ५३ हजार मेट्रिक टन विक्रमी गाळप केले.

ऑगस्ट २०२२ मध्ये शुगर टेक्नॉलॉजिस्ट असोसिएशन (नवी दिल्ली) या संस्थेचा उत्कृष्ट उद्योजगता पुरस्कार कार्यकारी संचालक जे. बी. घुगरकर यांना प्राप्त झाला आहे.

असे आहेत अन्य पुरस्कार