सीओ ६२१७५ ऊस वाणाची लागवड टाळा : डॉ. सुरेश उबाळे
ट्वेंटीवन शुगर्समार्फत ऊस विकास कार्यशाळेत तज्ज्ञांचे मार्गदर्शन
परभणी : सीओ ६२१७५ व एसएनके १३३७४ ऊस वाणांमुळे होणारे नुकसान लक्षात घेता, या दोन्ही जातींची लागवड शेतकऱ्यांनी टाळावी, असे आवाहन ऊस पैदासकार डॉ. सुरेश उबाळे यांनी केले. सायखेडा (ता. सोनपेठ) येथील ट्वेंटीवन शुगर्स युनिट २ च्या वतीने आयोजित ऊस विकास कार्यशाळेत ते शेतकऱ्यांना मार्गदर्शन करत होते.
सद्यस्थितीत पडलेल्या समाधानकारक पावसामुळे जायकवाडी धरण त्याचप्रमाणे गोदावरी नदीच्या लाभक्षेत्रातील बंधारे पूर्ण क्षमतेने भरले आहेत तसेच विहीर बोरवेलला सुद्धा मुबलक पाणी उपलब्ध झाले आहे. पाण्याची उपलब्धता झाल्यामुळे शेतकरी पूर्व हंगामी ऊस लागवडीचे नियोजन करत आहेत. ऊस पिकाची लागवड करण्यासाठी ऊसाच्या योग्य जातीची निवड व ऊस पिकाचे करावयाचे एकात्मिक व्यवस्थापन संदर्भात शेतकऱ्यांपर्यंत शास्त्रोक्त माहिती पोहोचवण्याच्या अनुषंगाने ट्वेंटीवन शुगर्स युनिट २ चे अध्यक्ष माजी मंत्री आमदार अमित देशमुख, उपाध्यक्ष विजय देशमुख, कार्यकारी संचालक सुभाष पाटील, मुख्य शेतकी अधिकारी तुकाराम गडदे यांच्या मार्गदर्शनाखाली ऊस विकास अधिकारी शिवप्रसाद येळकर यांच्या संकल्पनेतून मध्यवर्ती ऊस संशोधन केंद्र पाडेगावचे ऊस पैदासकार शास्त्रज्ञ डॉ सुरेश उबाळे यांच्या माध्यमातून दोन दिवसीय शिवार फेरीचे आयोजन करून शेतकऱ्यांना मार्गदर्शन करण्यात आले.
सदर उपक्रमांतर्गत सोनपेठ तालुक्यातील रामपुरी व परळी तालुक्यातील लोणी येथे कार्यशाळा घेऊन येळकर यांनी कारखाना कार्यक्षेत्रामध्ये ऊस पिकामध्ये सद्यस्थितीत निदर्शनास येत असलेले चाबुक काणी, गवताळ वाढ, पोक्का बोईंग रोग तसेच कांडी कीड, कृषी संशोधन केंद्रांची शिफारस नसलेल्या एसएनके १३३७४, सिओ ६२१७५ यांची माहिती देऊन मागील वर्षी ऊस लागवड करताना शेतकऱ्यांच्या झालेल्या चुका बाबत ऊहापोह केला.
कार्यक्रमाचे मुख्य मार्गदर्शक मध्यवर्ती ऊस संशोधन केंद्र पाडेगावचे ऊस पैदासकार शास्त्रज्ञ डॉ सुरेश उबाळे यांनी कारखाना साखर उतारा कमी असण्याची कारणे, ऊस जातीची भेसळ टाळणे, ऊस लागवडीचा योग्य कालावधी, महाराष्ट्र राज्यासाठी शिफारस असलेल्या फुले ऊस १५००६, फुले ऊस १५०१२, फुले ऊस १३००७, एम एस १०००१, सिओ ८६०३२, सीओव्हीएसआय १८१२१ ऊस जातींची गुणवैशिष्ट्ये व प्रति हेक्टरी उत्पादकता आणि साखर उतारा, त्रिस्तरीय बेणे मळा पद्धती, रोप पद्धतीने ऊस लागवड केल्यामुळे खर्चामध्ये होणारी बचत, ऊस पिकाचे अन्नद्रव्य व्यवस्थापन करण्यासाठी बाजारामध्ये उपलब्ध असलेल्या रासायनिक खताच्या ग्रेड निहाय संतुलित मात्रा, ऊस लागवड करण्यासाठी जमिनीची निवड, जमिनीची मशागत, सरी तयार करताना घ्यावयाची काळजी सेंद्रिय खतांचा वापर संदर्भात विस्तृतपणे माहिती देऊन शासनामार्फत बंदी आणलेल्या सीओ ६२१७५ व शिफारस नसलेल्या एसएनके १३३७४ ऊस पिकाची लागवड केल्यामुळे होणारे तोटे लक्षात घेता अशा ऊस जातीची लागवड टाळण्याबाबत शेतकऱ्यांना आवाहन केले.
मुख्य शेतकी अधिकारी तुकाराम गडदे यांनी कारखान्या मार्फत अनुदानित ऊस रोप वितरण, एकात्मिक ऊस व्यवस्थापन सल्ला केंद्र या ऊस विकास योजनांची माहिती दिली.
यावेळी ऊस पुरवठा अधिकारी सुरेश आळसे, सुधाकर कदम, रतन कदम, विभाग प्रमुख लक्ष्मीकांत रेवडकर, राम कुलकर्णी, दिनेश जयस्वाल, वैजनाथ हांडे, भगवान सोळंके, भगवान इखे, सुरेंद्र डुबे, गटप्रमुख गोपाळ जाधव, सर्वोत्तम दिवाण, भास्कर यादव, किशन सोळंके, किर्तेश्वर यादव, शरद शिंदे, दत्तात्रय गवळी, दिलीप फड, विजय सोळंके ऊस नर्सरी चालक विजय नांदूरे, रामपुरीचे शेतकरी ऍड ज्ञानेश्वर यादव, बाळू साठे, विशाल चौखट, सुरेश यादव, लोणीचे उपसरपंच प्रल्हाद शिंदे, विश्वनाथ शिंदे, गोविंद देवकते, लिंबाजी सोनवणे, नारायण सोनवणे, सुभाष सोनवणे, रघुनाथ सोनवणे, विश्वनाथ सोनवणे, दत्ता होळकर, आत्तम गुट्टे, गोविंद माने, हनुमंत यादव आदी शेतकरी मोठ्या संख्येने उपस्थित होते.
