डॉ. तनपुरे कारखान्याला शक्य ती सर्व मदत करणार

अहिल्यानगर : राहुरीतील डॉ. बा. बा. तनपुरे सहकारी साखर कारखाना हा या परिसराचा जिव्हाळ्याचा विषय आहे. तो सुरळीतपणे सुरू होण्यासाठी कठोर निर्णय घ्यावे लागतील. तुम्ही कारखान्याचे मालक आहात. कारखान्याचा प्रश्न गंभीर बनला आहे. एकरकमी तसेच शासकीय पातळीवर यासाठी मदतीचा प्रस्ताव करण्याच्या सूचना केल्याने कारखान्याला शक्य ती सर्व मदत करू, असे आश्वासन उपमुख्यमंत्री अजित पवार यांनी दिले. कृषी उत्पन्न बाजार समितीच्या आवारात उभारण्यात आलेल्या शेतकरी भवन व उपहारगृहाचे उद्घाटन उपमुख्यमंत्री पवार यांच्या हस्ते झाले. त्यावेळी ते बोलत होते.

दरम्यान, आगामी जिल्हा परिषद व पंचायत समितीच्या निवडणुकीत राष्ट्रवादी काँग्रेसचे नेते सभापती अरुण तनपुरे यांना साथ द्या, त्यांच्या पाठीमागे आम्ही भक्कमपणे राहू, असे त्यांनी यावेळी सांगितले.

यावेळी आमदार काशीनाथ दाते, माजी आमदार लहू कानडे, कैलास पाटील, डॉ. बाबुराव बापूजी तनपुरे सहकारी साखर कारखान्याचे संचालक अॅड. केरू पानसरे, बाजार समितीचे सभापती अरुणराव तनपुरे, हर्ष तनपुरे, राजेंद्र नागवडे, अशोक सावंत, कपिल पवार आदी उपस्थित होते.

उपमुख्यमंत्री पवार म्हणाले की, केंद्र व राज्य सरकार दोन्हीही  तनपुरे कारखान्याला मदत करतील. पण अगदीच काटकसरीने कारभार करावा लागेल. मी व आमचे संचालक कोणीही कारखान्याच्या गाड्या वापरत नाहीत. येथे प्रत्येक संचालकांना कारखान्याच्या गाड्या होत्या. एवढे इंधन यावर खर्च झाले की तेवढ्यात चंद्रावरून गाडी परत येईल. सभापती अरुण तनपुरेंच्या नेतृत्वाखालील बाजार समिती राज्यात पहिल्या दहा समित्यात आहे. समित्यांच्या बळकटीकरणासाठी राज्य सरकार मोठा निधी उपलब्ध करून देणार आहे.

पुणे- अहिल्यानगर नव्या रेल्वेमार्गामुळे वाहतूक सुलभ होणार

केंद्र शासनाने पुणे अहिल्यानगर नवीन रेल्वे मार्गास मंजुरी दिली असून, भूसंपादन प्रक्रियेद्वारे शेतकऱ्यांच्या जमिनी संपादित करण्यात येणार असून, त्यांना योग्य मोबदला देण्यात येईल. या मार्गामुळे शेतमालाची वाहतूक सुलभ होणार असल्याचे उपमुख्यमंत्री अजित पवार यांनी यावेळी सांगितले.