इतर राज्यांप्रमाणे ऊस वाहतूक ट्रॅक्टरसह ट्रॉलीला एकत्रित परवाना द्या
सांगली : इतर राज्यांप्रमाणे महाराष्ट्रातही साखर कारखान्यांना ऊस वाहतूक करणाऱ्या वाहन चालकास ट्रॅक्टर आणि ट्रॉलीचा एकत्रित वाहन परवाना मिळावा, अशी मागणी नुकतीच स्वतंत्र भारत पक्षाचे जिल्हाध्यक्ष सुनील फराटे यांनी सह प्रादेशिक परिवहन अधिकारी (आरटीओ) यांच्याकडे निवेदनाद्वारे केली आहे. या मागणीचा विचार न केल्यास तीव्र आंदोलन करण्याचा इशाराही जिल्हाध्यक्ष फराटे यांनी दिला आहे. यावेळी बाळासाहेब पाटील, समीर पाटील, अरुण पाटील, अनिल पाटील, माणिकआवटी, राजेंद्र मासुले, विपुल दळवी, शरद मासुले, संजू आलदर आदी कार्यकर्ते उपस्थित होते.
सुनील फराटे यांनी सह प्रादेशिक परिवहन अधिकाऱ्यांना (आरटीओ) दिलेल्या निवेदनात म्हटले आहे की, आपल्या विभागाकडून १० वर्षापूर्वी ऊस वाहतूक करणाऱ्या ट्रॅक्टर व ट्रॉली चालकास दोन्हीचा एकत्रित परवाना मिळत होता; मात्र गेल्या काही वर्षापासून महाराष्ट्रामध्ये फक्त ट्रॅक्टरचाच परवाना मिळत आहे. इतर राज्यांमध्ये ट्रॅक्टर व ट्रॉली असा दोन्हींचा एकत्रित परवाना मिळतो. ट्रॅक्टरबरोबरच आरटीओकडून ट्रॉलीचीही नोंदणी केली जाते. ट्रॉलीसाठी स्वतंत्र विमाही घ्यावा लागतो. मात्र, ट्रॉलीखाली सापडून अपघात झाल्यास विमा कंपनी भरपाई देत नाही. विमा कंपनी वाहन चालकाचा ट्रॉली चालविण्याचा परवाना मागते. याबाबत आर.टी. ओ. अधिकाऱ्यांशी चर्चा केली असता, ते स्कूल ड्रायव्हींगकडे बोट दाखवतात. ट्रॅक्टरबरोबर ट्रॉलीचाही परवाना घेण्यास वाहन मालक व वाहन चालकांची तयारी आहे. मात्र, स्कूल ड्रायव्हींगकडे, आरटीओकडे स्कूल ड्रायव्हींगच्या नावाने नोंदणीकृत केलेल्या ट्रॉल्या नसल्यामुळे ट्रॉलीचा परवाना घेणे वाहन चालकास शक्य नाही. याचाच फायदा विमा कंपनीवाले घेत आहेत.
