कल्याणच्या साखर व्यापाऱ्याची २४ लाखांची फसवणूक

सांगली : कल्याणमधील एका साखर व्यापाऱ्याला सांगलीतील एका पुरवठादाराकडून तब्बल २४ लाख २५ हजार रुपयांचा गंडा घालण्यात आल्याचा धक्कादायक प्रकार समोर आला आहे. मार्च ते जुलै या पाच महिन्यांच्या कालावधीत ही फसवणूक झाली असून, या प्रकरणी कल्याणच्या व्यापाऱ्याने बाजारपेठ पोलीस ठाण्यात तक्रार दाखल केली आहे, ज्यानंतर पोलिसांनी तातडीने तपास सुरू केला आहे.

दानिश निजाम सैय्यद (वय ३१) असे फसवणूक झालेल्या कल्याणच्या साखर घाऊक विक्रेत्याचे नाव आहे, जे दूधनाका परिसरात राहतात. मार्च महिन्यात सैय्यद यांनी सांगली येथील बाजार समिती (मार्केट यार्ड) आवारातील एका घाऊक साखर पुरवठादाराकडे ५० टन साखरेची मागणी नोंदवली होती. या मागणीच्या बदल्यात त्यांनी सुरुवातीला त्या पुरवठादार व्यापाऱ्याच्या ‘गणेश शुगर्स’ या आस्थापनेच्या बँक खात्यात ऑनलाईन माध्यमातून १६ लाख रुपये आगाऊ रक्कम म्हणून जमा केले होते. दोघांमध्ये २५ टन साखरेचा पहिल्या टप्प्यात पुरवठा करावा आणि त्यानंतर उर्वरित मागणी पूर्ण करावी, असे ठरले होते.

पहिल्या टप्प्यानंतर, दानिश सैय्यद यांनी दुसऱ्यांदा त्याच सांगलीच्या व्यापाऱ्याच्या बँक खात्यात साखरेच्या पुरवठ्यासाठी ऑनलाईन पद्धतीने आठ लाख २५ हजार रुपये जमा केले. अशा प्रकारे, त्यांनी एकूण २४ लाख २५ हजार रुपये आगाऊ दिले. मात्र, मार्चमध्ये मागणी नोंदवूनही सांगलीच्या व्यापाऱ्याने साखरेचा पुरवठा केला नाही. याउलट, त्याने विविध कारणे देऊन दानिश सैय्यद यांना टाळले.

पाच महिने उलटूनही साखर मिळत नसल्याने, दानिश सैय्यद यांनी आपली दिलेली २४ लाख २५ हजार रुपयांची रक्कम परत करण्याची मागणी सांगलीच्या व्यापाऱ्याकडे लावून धरली. तेव्हा त्या साखर पुरवठादार व्यापाऱ्याने सैय्यद यांना बँकेत न वटणारे, ‘खाडाखोड केलेले धनादेश‘ दिले. दानिश सैय्यद यांनी हे धनादेश बँकेत जमा केल्यावर, खात्यात पुरेशी रक्कम नसल्याने ते वटले नाहीत.

आपली साखरेची ऑर्डर पूर्ण झाली नाही आणि दिलेले पैसेही परत मिळत नाहीत, हे लक्षात आल्यावर कल्याणचे व्यापारी दानिश सैय्यद यांनी आपली आर्थिक फसवणूक झाल्याचे ओळखले आणि त्वरित बाजारपेठ पोलीस ठाण्यात तक्रार दाखल केली. पोलिसांनी या प्रकरणी गुन्हा दाखल केला असून, सहाय्यक पोलीस निरीक्षक तुळशीराम राठोड हे पुढील तपास करत आहेत.