असं जगायचं राहून गेले

अस्मादिक  आज्ञाधारक फार
  कायम पहिला असा हुशार
होता गरीबीचा रोष अपार
उनाडक्या करणे राहून गेले ||१||

कॉलेजातही होतो शिस्तशीर
नव्हं तसा गबाळा बेफिकीर
होतो कायमच आटोपशीर
लाईन मारायचं राहून गेले||२||

नोकरीत नाही केला आराम
कामामध्येच सापडला राम
कायम मिळाला वाजवी दाम
चुगल्या करायचं राहुन गेले||३||

होईल तेवढी केली मदत
नाही काढली तयाची वरात
नियोजन  शस्त्र होते हातात
कुचाळक्या करणे राहुन गेले||४||

वाणी सरळसोटच राहिली
भल्याची बु-याची पारख केली
सालस वृत्ती अंगी बाळगली
नथीतलेच तीर  राहून गेले||५||

डोळस श्रद्धा देवाला  वाहिली
मदिरालये नाही धुंडाळली
अबोलपणाची धग सोसली
भामटे  वागायचे राहून गेले||६||

रचनाकार: आहेर वाळू रघुनाथ नाशिक. (बीई एमआयई बीओई)