…अन्यथा आम्ही  निफाड कारखान्याच्या गेटवरच फाशी घेऊ!

कामगार व सभासदांचा इशारा; ८१ कोटी थकबाकीचा मुद्दा ऐरणीवर

निफाड : जोपर्यंत कामगारांचे जवळपास थकित ८२ कोटी रुपये व सभासदांच्या ठेवी मिळत नाहीत, तोपर्यंत निसाका कारखाना कुठल्याही परिस्थितीत विक्री करू दिला जाणार नाही. कारखाना हा शेतकरी, सभासद व कामगारांच्या कष्टाच्या घामातून उभा राहिलेला आहे, त्याला गिळंकृत होऊ देणार नाही, अन्यथा आम्ही सामूहिक आत्महत्या करू व गेटवरच फाशी घेऊ, असा इशारा कारखाना कार्यस्थळावर झालेल्या बैठकीत कामगार व सभासदांनी दिला. निफाड साखर कारखाना हा सभासदांच्या मालकीचा असून, भाडेपट्टा कराराची पुनर्रचना करावी. सत्तेचा दुरुपयोग करून निफाड कारखाना गिळंकृत करण्याचा काही महाभागांचा डाव आहे. सभासद व कामगारांना सोबत घेऊन मोठे जनआंदोलन उभारले जाईल, असा इशाराही या वेळी दिला आहे. यावेळी गोदाकाठच्या गावांमधील सभासद शेतकरी व कामगार मोठ्या संख्येने उपस्थित होते.

निसाका गेटवर यासंदर्भात शुक्रवारी (दि. ८) कामगार व सभासदांनी घोषणाबाजी करत निदर्शने केली. बैठकीत सरचिटणीस बी. जी. पाटील यांनी जिल्हा बँकेला कारखाना विक्री करू न देण्याचा निर्धार व्यक्त केला. कामगार संघटनेचे कार्याध्यक्ष प्रमोद गडाख, माजी सरपंच व सभासद प्रतिनिधी खंडू बोडके पाटील, लहू मोरे, नानासाहेब दाते, गोकूळ झाल्टे, अमित ताजणे, सोमनाथ झाल्टे यांनी सर्व लोकप्रतिनिधींनी मतभेद विसरून निसाका वाचवण्यासाठी पुढाकार घ्यावा, असे आवाहन केले. माजी आमदार अनिल कदम यांनी व्हिडिओ कॉलद्वारे संवाद साधत सभासद व कामगारांच्या पाठीशी खंबीर उभे असल्याची ग्वाही दिली.