ऊस गाळपात सोलापूर जिल्ह्याचा महाराष्ट्रात नवा विक्रम!

सोलापूर : अतिवृष्टी आणि महापुरासारख्या नैसर्गिक संकटांवर मात करत सोलापूर जिल्ह्याने यंदाच्या ऊस गाळप हंगामात ऐतिहासिक कामगिरी नोंदवली आहे. जिल्ह्यातील ३४ साखर कारखान्यांनी तब्बल १ कोटी ३४ लाख १३ हजार ६३२ टन उसाचे गाळप करून राज्यात अव्वल स्थान पटकावले आहे. विशेष म्हणजे, साखर उत्पादनाच्या बालेकिल्ला मानल्या जाणाऱ्या कोल्हापूर विभागापेक्षा सोलापूरने १५ लाख टनांनी अधिक गाळप करत नवा उच्चांक प्रस्थापित केला आहे.

विक्रमी गाळप: सोलापूर जिल्ह्यातील कारखान्यांनी १.३४ कोटी टन गाळपातून १ कोटी १६ लाख २३ हजार ८१८ क्विंटल साखरेचे उत्पादन केले आहे.

राज्याची स्थिती: ३० जानेवारीअखेर महाराष्ट्रातील २०६ साखर कारखान्यांनी एकूण ८ कोटी ३८ लाख ५१ हजार टन उसाचे गाळप पूर्ण केले असून, ७ कोटी ७१ लाख ३ हजार क्विंटल साखरेचे उत्पादन झाले आहे.

साखर उतारा: राज्याचा सरासरी साखर उतारा ९.२% इतका असून, अनेक कारखान्यांनी रसापासून थेट इथेनॉल निर्मितीवर भर दिल्याने प्रत्यक्ष साखर उत्पादनात काहीशी घट दिसून येत आहे.

हंगामाचा कालावधी: सद्यस्थितीत हंगाम अंतिम टप्प्यात असला तरी, अद्याप शिल्लक असलेला ऊस पाहता गाळप आणखी दीड महिना सुरू राहण्याची शक्यता साखर आयुक्तालय आणि तज्ज्ञांनी व्यक्त केली आहे. यावर्षी १०४ खासगी आणि १०२ सहकारी अशा एकूण २०६ कारखान्यांमुळे राज्याच्या ग्रामीण अर्थव्यवस्थेला मोठी गती मिळाली आहे. सुरुवातीला पावसाळ्यामुळे उत्पादन घटण्याची भीती व्यक्त केली जात होती, मात्र प्रत्यक्ष आकडेवारीने सकारात्मक चित्र स्पष्ट केले आहे.

साखर उताऱ्यातही सहकारी कारखान्यांची बाजी
खासगी साखर कारखान्यांपेक्षा यावर्षी सहकारी साखर कारखान्यांनी अधिकचे ऊस गाळप केले आहे. यामध्ये खासगी १०४ साखर कारखान्यांनी ४ कोटी १४ लाख तर सहकारी १०२ कारखान्यांनी ४ कोटी २३ लाख टन उसाचे गाळप केले आहे. ऊस गाळपाबरोबरच साखर उताऱ्यातही सहकारी साखर कारखान्यांनी बाजी मारली आहे.

गतवर्षीचा विक्रम मोडण्याची शक्यता
दरम्यान, सोलापूर जिल्ह्याने राज्यात ऊस गाळप आणि साखर उत्पादनात मोठी आघाडी घेतली असून, जवळपास १ कोटी ३५ लाख टन उसाचे गाळप पूर्ण केले आहे. अजूनही ऊस गाळप हंगाम सुसाट सुरू आहे. गतवर्षी राज्यात ८५० लाख टन उसाचे गाळप तर ८१ लाख टन साखरेचे उत्पादन झाले होते. गतवर्षीचा ऊस गाळपाचा विक्रम यावर्षी मोडून निघेल, अशी शक्यता आहे.