इंडियन ऑइल इथेनॉलसाठी विकत घेणार गहू, तांदळाचे काड

चंडीगड : इंडियन ऑइल विकत घेणार गहू, तांदळाचे काड, उत्तरेकडील शेतकऱ्यांसाठी ही आनंदाची बातमी आहे. त्यामुळे आता शेतकऱ्यांना हे काड (stubble) शेतात जाळावे लागणार नाही. इंडियन ऑइल कॉर्परेशनच्या पानिपत रिफायनरीने शेतकऱ्यांकडून काड खरेदी करण्याची घोषणा केली आहे. त्या बदल्यात कंपनीकडून चांगली रक्कमही दिली जाईल. त्यामुळे दिल्ली आणि परिसरातील प्रदूषणही कमी होईल.

भात पीक काढणीला सुरुवात झाली असताना, stubble व्यवस्थापन ही शेतकऱ्यांसमोर सर्वात मोठी समस्या असल्याचे दिसून येत आहे. हरियाणा, पंजाब, उत्तर प्रदेश आणि इतर अनेक राज्यांतूनही काड जाळण्याच्या घटना घडू लागल्या आहेत. त्याचबरोबर असे करणाऱ्या शेतकऱ्यांवर दंडासह एफआयआर दाखल करण्याच्या सूचना सरकारने दिल्या आहेत.

या सगळ्या पार्श्वभूमीवर शेतकऱ्यांसाठी एक मोठी खूशखबर समोर आली आहे. हरियाणातील पानिपत येथील इंडियन ऑइल कॉर्पोरेशन लिमिटेड (IOCL) रिफायनरीने शेतकऱ्यांकडून भात आणि गहू काढणीनंतर राहिलेल्या काडाची खरेदी करण्याची घोषणा केली आहे. कंपनी स्टबलपासून इथेनॉल तयार करणार आहे.

रिफायनरीमध्येच इथेनॉल तयार करण्याचा प्लांट उभारण्यात आला आहे. हा प्लांट 900 कोटी रुपये खर्चून बांधण्यात आला आहे. प्रतिदिन एक लाख लिटर इथेनॉल तयार करण्याची क्षमता या प्लांटची आहे.