ऊस बिलाच्या मागणीसाठी शेतकऱ्याचा संताप; पंढरपुरात आंदोलन
पंढरपूर : ऊस उत्पादक शेतकऱ्यांचे प्रलंबित ऊस बिल, शेतपंपांची वीजपुरवठा समस्या आणि विहिरींच्या खोदकामावरील बंदी यांसह विविध मागण्यांसाठी पंढरपूर तहसील कार्यालयासमोर आंदोलन करण्यात आले. या आंदोलनादरम्यान एका शेतकऱ्याने अंगावर पेट्रोल ओतून आत्मदहनाचा प्रयत्न केल्याने परिसरात खळबळ उडाली.
प्रशासनाच्या धोरणांवर तीव्र नाराजी व्यक्त करत आंदोलकांनी शासनाविरोधात घोषणाबाजी केली. ऊस बिलाची थकीत रक्कम तातडीने मिळावी, अशी मागणी शेतकऱ्यांनी केली. थकीत ऊस बिलांच्या प्रश्नावर सोलापूर जिल्ह्यात शेतकऱ्यांची आंदोलने तीव्र होत असल्याचेही दिसून येत आहे.
दरम्यान, आत्मदहनाचा प्रयत्न करणाऱ्या शेतकऱ्याला पोलिसांनी वेळीच रोखले. आंदोलनाच्या पार्श्वभूमीवर तहसील कार्यालय परिसरात पोलिसांचा बंदोबस्त वाढविण्यात आला.
शेतकऱ्यांच्या मागण्यांकडे प्रशासनाने गांभीर्याने लक्ष न दिल्यास आंदोलन आणखी तीव्र करण्याचा इशारा आंदोलकांनी दिला. महसूल, वन विभाग आणि कृषी विभागाच्या अधिकाऱ्यांनाही याबाबत निवेदन देण्यात आले.
थकीत ऊस बिलांचा प्रश्न तातडीने मार्गी लावावा, अन्यथा आंदोलन अधिक तीव्र करण्याचा इशारा शेतकरी संघटनांनी दिला आहे.
