हुतात्मा साखर कारखान्यात मोठी राजकीय घडामोड : वैभवकाका नायकवडी यांचा राजीनामा

कारखान्याच्या हितासाठी निर्णय, पुढेही सक्रिय राहणार

सांगली : हुतात्मा सहकारी साखर कारखान्याच्या राजकारणात महत्त्वाची घडामोड घडली असून कारखान्याचे अध्यक्ष वैभव काका नायकवडी यांनी आपल्या पदाचा राजीनामा दिला आहे. गेल्या काही दिवसांपासून कारखान्याच्या कार्यपद्धती, आर्थिक व्यवहार आणि कर्ज पुनर्गठनासंदर्भातील प्रश्नांवरून सुरू असलेल्या आंदोलनाच्या पार्श्वभूमीवर हा निर्णय घेण्यात आला आहे. त्यामुळे कारखान्याच्या राजकीय आणि प्रशासकीय वर्तुळात चर्चांना उधाण आले आहे.

गेल्या काही आठवड्यांपासून कारखान्याच्या काही संचालकांनी आणि सभासदांनी विविध मुद्द्यांवर प्रश्न उपस्थित केले होते. याच पार्श्वभूमीवर अध्यक्षांविरोधात अविश्वास प्रस्ताव आणण्याच्या हालचालीही सुरू झाल्या होत्या. परिस्थिती अधिक चिघळू नये आणि कारखान्याच्या दैनंदिन कामकाजावर परिणाम होऊ नये, या उद्देशाने नायकवडी यांनी स्वतःहून पदाचा राजीनामा देण्याचा निर्णय घेतल्याचे सांगितले जात आहे.

राजीनाम्यानंतर आयोजित पत्रकार परिषदेत वैभव नायकवडी यांनी स्पष्ट केले की, कारखान्याच्या प्रगतीपेक्षा कोणतेही पद मोठे नाही. कारखान्याच्या हिताला प्राधान्य देत आपण अध्यक्षपदाचा राजीनामा दिला असून, पुढेही सभासद, ऊस उत्पादक शेतकरी आणि कामगारांच्या हितासाठी सक्रियपणे कार्यरत राहणार असल्याचे त्यांनी सांगितले.

“हुतात्मा हा केवळ एक साखर कारखाना नसून हजारो शेतकऱ्यांच्या आशा-आकांक्षांचे केंद्र आहे. त्यामुळे कोणत्याही प्रकारचा संघर्ष किंवा वाद कारखान्याच्या प्रगतीत अडथळा ठरू नये, यासाठी हा निर्णय घेतला आहे,” असे नायकवडी यांनी नमूद केले.

अविश्वास प्रस्तावाची प्रक्रिया थांबणार?

कारखान्याच्या संचालक मंडळातील काही सदस्यांनी अध्यक्षांविरोधात अविश्वास प्रस्तावाची तयारी सुरू केली होती. कारखान्यातील ११ संचालकांपैकी बहुसंख्य संचालक या प्रक्रियेत सहभागी असल्याची चर्चा होती. मात्र अध्यक्षांनी राजीनामा दिल्यानंतर अविश्वास प्रस्तावाची प्रक्रिया आपोआप थांबण्याची शक्यता व्यक्त केली जात आहे.

कारखान्याच्या आर्थिक स्थिती, कर्ज पुनर्गठन, प्रशासनातील पारदर्शकता आणि निर्णयप्रक्रियेतील सहभाग या मुद्द्यांवरून सुरू असलेल्या आंदोलनाने गेल्या काही दिवसांत वेग घेतला होता. या आंदोलनामुळे कारखान्याच्या परिसरात तणावाचे वातावरण निर्माण झाले होते. आता अध्यक्षांच्या राजीनाम्यानंतर आंदोलनाची दिशा काय असेल, याकडे सभासद आणि ऊस उत्पादकांचे लक्ष लागले आहे.

वैभव नायकवडी यांच्या राजीनाम्यानंतर कारखान्याच्या अध्यक्षपदासाठी नव्या नेतृत्वाची निवड करण्याची प्रक्रिया लवकरच सुरू होण्याची शक्यता आहे. आगामी काळात संचालक मंडळाची बैठक होऊन पुढील रणनीती निश्चित केली जाणार असल्याचे संकेत मिळत आहेत.

हुतात्मा साखर कारखाना हा राज्यातील सहकार क्षेत्रातील महत्त्वाचा आणि प्रभावी कारखाना मानला जातो. त्यामुळे या घडामोडींचा परिणाम केवळ कारखान्यापुरता मर्यादित न राहता संपूर्ण परिसरातील सहकार राजकारणावर होण्याची शक्यता व्यक्त केली जात आहे.