उसाचा ‘एसएपी’ दर न वाढवल्यास तीव्र आंदोलन
अंबाला : हरियाणा सरकारने उसाच्या हंगामासाठी एसएपीमध्ये अद्याप वाढ केली नसल्यामुळे, शेतकऱ्यांमध्ये नाराजी आहे. दरम्यान, सरकारने दरवाढ न केल्यास जानेवारीमध्ये राज्यव्यापी आंदोलन छेडण्यात येईल, असा इशारा भारतीय किसान युनियनने (चारुणी) दिला आहे.
सध्या सुरू असलेल्या गळीत हंगामासाठी उसासाठी एसएपी 362 रुपयांवरून 450 रुपये प्रति क्विंटल करण्याची मागणी युनियन करत आहे. ऊस पिकावर किडीचा प्रादुर्भाव झाल्याने आणि पीक वाचवण्यासाठी शेतकऱ्यांनी फवारणीवर मोठा खर्च केल्याने यंदा उत्पादन खर्चात आणखी वाढ झाल्याचे शेतकऱ्यांनी सांगितले.
बीकेयू (चारुणी) प्रमुख गुरनाम सिंग चारुणी म्हणाले, “गाळप हंगाम आधीच सुरू झाले आहे, परंतु राज्य सरकारने अद्याप उसाचे दर जाहीर केलेले नाहीत. पंजाब सरकारने SAP 380 रुपये प्रति क्विंटल केला आहे. याशिवाय तोडणी करणार्‍यांकडून काढण्यात आलेल्या ऊसाच्या वजनात पाच टक्के कपात होती, ती वाढवून सात टक्के करण्यात आली आहे. पंजाबमध्ये 3 टक्के आणि महाराष्ट्रात 4.5 टक्के घट झाली आहे.
हरियाणा सरकार शेतकऱ्यांवर अन्याय करत आहे. हरियाणात उसाचा भाव देशात सर्वाधिक असायचा. सध्या पंजाब हरियाणापेक्षा 18 रुपये प्रति क्विंटल अधिक देत आहे. आश्‍चर्याची बाब म्हणजे गाळप केल्यानंतर शिल्लक राहणारा बगॅस, सुका कचरा 400 रुपये क्विंटल दराने विकला जात आहे. वाढत्या वजनात कपात करून सरकार ऊस उत्पादक शेतकऱ्यांना दुहेरी फटका देण्याचा प्रयत्न करत आहे,” असा आरोप संघटनेने केला.
दरम्यान, राज्याचे सहकार मंत्री डॉ बनवारीलाल म्हणाले, “पंचायत निवडणुकीमुळे आतापर्यंत आदर्श आचारसंहिता लागू होती. हे प्रकरण मुख्यमंत्र्यांसमोर मांडून त्यावर लवकरच तोडगा काढला जाईल.
या आधी हरियाणाचे एसएपी देशात सर्वाधिक होते. पंजाबने या हंगामात दरवाढ करून हरियाणावर मात केली आहे. त्यामुळे हरियाणा सरकार आता काय निर्णय घेणार याकडे देशोच लक्ष आहे. उत्तरेकडील राज्यांमध्ये एफआरपीपेक्षा एसएपी अधिक असतो आणि त्यावरच उसाचे दर ठरतात. तेथे एसएपी यंत्रणा अस्तित्वात आहे.
