ऊसतोडीसाठी घेतलेले पैसे परत न केल्याने अपहरण; आरोपीला २४ तासांत अटक

सांगली जिल्ह्यात नेऊन मारहाण; कुडाळ पोलिसांकडून अपहृत व्यक्तीची सुटका

कुडाळ : ऊसतोडीच्या कामासाठी घेतलेली रक्कम परत न केल्याच्या कारणावरून कुडाळ शहरातील एका व्यक्तीचे अपहरण करून त्याला सांगली जिल्ह्यातील जत तालुक्यातील तिकोंडी येथे नेऊन मारहाण करण्यात आली. कुडाळ पोलिसांनी तांत्रिक माहितीच्या आधारे शोध घेत २४ तासांच्या आत आरोपीला अटक केली आणि अपहृत व्यक्तीची सुटका केली.

या प्रकरणी जयवंत कोंडीबा करे (४०, रा. तिकोंडी, जत, जि. सांगली) याच्याविरुद्ध 1 कुडाळ पोलीस ठाण्यात गुन्हा दाखल करण्यात आला आहे. तर सुनिता पवार (रा. पानबाजार, कुडाळ) यांनी याबाबत पोलिसांत तक्रार दिली आहे.

सविस्तर वृत्त असे कि, फिर्यादी सुनिता पवार यांचे न पती प्रकाश रमेश पवार (३८) यांनी उसतोड कामासाठी जयवंत करे याच्याकडून हातउसने रक्कम घेतली होती. ही रक्कम परत न करण्याच्या कारणावरून २९ सप्टेंबर रोजी दुपारी दुपारी १२ वा. च्या सुमारास कुडाळ बसस्थानक परिसरातून प्रकाश पवार यांचे अपहरण करण्यात आले. त्यानंतर त्यांना जत- तिकोंडी येथे नेण्यात आले. तेथे प्रकाश पवार यांना मारहाण करण्यात आली. दरम्यान .पती बेपत्ता झाल्यानंतर सुनिता पवार यांनी याबाबत कुडाळ पोलिसांकडे धाव घेत तक्रार दाखल केली. त्यानुसार २ ऑक्टोबर रोजी कुडाळ पोलीस ठाण्यात गुन्हा दाखल करण्यात आला. प्रकरणाचे गांभीर्य लक्षात पोलिसांनी तातडीने तपास सुरू केला. अखेर ३ ऑक्टोबर रोजी आरोपी जयवंत करे आणि प्रकाश पवार या दोघांनाही पोलिसांनी ताब्यात घेऊन कुडाळ येथे आणले.

आरोपीला पाच दिवसांची पोलिस कोठडी

कुडाळ येथे आणल्यानंतर जयवंत करे याला पोलिसांनी अटक केली. त्याला न्यायालयात हजर केले असता न्यायालयाने पाच दिवसांची पोलीस कोठडीत ठेवण्याचे आदेश दिले आहे. या प्रकरणाचा तपास सहा. पोलीस निरीक्षक जयदीप पाटील यांनी केला. त्यांच्या नेतृत्वाखाली पोलीस शेष मोरे, प्रमोद काळसेकर, रूपेश गुरव तसेच महिला पोलीस सुप्रिया भागवत यांनी तपासात महत्त्वाची भूमिका बजावली.