भारतातील साखर उत्पादनात दुप्पट वाढ; उत्पादन २३.५९ लाख टनांवर — ISMA

नवी दिल्ली | शुगरटुडे
चालू २०२६-२७ च्या साखर हंगामात १५ नोव्हेंबरपर्यंत देशातील एकूण साखर उत्पादन दुपटीहून अधिक वाढून २३.५९ लाख टनांवर पोहोचले आहे. देशातील प्रमुख उत्पादक राज्य असलेल्या महाराष्ट्रात साखर कारखान्यांचे गाळप लवकर सुरू झाल्यामुळे ही लक्षणीय वाढ झाली असल्याची माहिती ‘इंडियन शुगर अँड बायो-एनर्जी मॅन्युफॅक्चरर्स असोसिएशन’ने (ISMA) दिली आहे. गेल्या वर्षी याच कालावधीत देशात ११.४९ लाख टन साखर उत्पादन झाले होते.
भारतात साखरेचा गाळप हंगाम साधारणपणे ऑक्टोबर ते सप्टेंबर असा चालतो.
महाराष्ट्रात उत्पादनाची तिप्पट झेप
देशात साखरेचे सर्वाधिक उत्पादन करणाऱ्या महाराष्ट्रात उत्पादनाने मोठी उसळी घेतली आहे. राज्यात उत्पादन मागील वर्षीच्या ५.२५ लाख टनांवरून तिपटीपेक्षा अधिक वाढून १८.५१ लाख टनांवर गेले आहे. महाराष्ट्रातील कारखान्यांनी इतर राज्यांच्या तुलनेत ८ ऑक्टोबरपासूनच गाळप सुरू केले होते. तसेच १५ नोव्हेंबरपर्यंत राज्यात १५४ साखर कारखाने सुरू झाले आहेत, तर गेल्या वर्षी याच काळात १३२ कारखाने कार्यरत होते.
उत्तर प्रदेश आणि कर्नाटकातील स्थिती
- उत्तर प्रदेश: दुसऱ्या क्रमांकावर असलेल्या उत्तर प्रदेशात साखर उत्पादन घटून २.१० लाख टनांवर आले आहे; मागील वर्षी या कालावधीत ते ४.२५ लाख टन होते. राज्यात सध्या ८० कारखाने सुरू असून गेल्या वर्षी ८८ कारखाने कार्यरत होते.
- कर्नाटक: तिसऱ्या क्रमांकावरील कर्नाटकात उत्पादनात फारसा बदल झालेला नाही. कर्नाटकात उत्पादन १.४० लाख टन झाले असून गेल्या वर्षी ते १.४६ लाख टन होते. सध्या तेथे ५६ कारखाने सुरू आहेत, तर मागील वर्षी ६८ कारखाने सुरू होते.
देशभरात ३१३ कारखाने सुरू
ISMA चे महासंचालक दीपक बल्लानी यांनी सांगितले की, यंदाचा साखर हंगाम वेगाने पुढे जात असून १५ नोव्हेंबर २०२६ पर्यंत देशभरात ३१३ साखर कारखान्यांचे कामकाज सुरू झाले आहे, तर मागील वर्षी याच काळात ३११ कारखाने कार्यरत होते. उत्तर प्रदेश आणि कर्नाटकातही गाळपाचा वेग वाढत असून लवकरच आणखी कारखाने सुरू होतील.
देशांतर्गत साखरेचा पुरवठा समाधानकारक
नवीन उत्पादनाला वेग आल्यामुळे देशांतर्गत साखरेची उपलब्धता अत्यंत समाधानकारक आहे, असे दीपक बल्लानी यांनी स्पष्ट केले. स्थानिक मागणी पूर्ण करण्यासाठी आणि बाजारात पुरेसा पुरवठा राखण्यासाठी साखर उद्योग पूर्णपणे सुसज्ज आहे. दरम्यान, ISMA च्या तिसऱ्या अंदाजानुसार, इथेनॉलकडे वळवल्यानंतर २०२५-२६ हंगामासाठी देशाचे निव्वळ साखर उत्पादन २९.३ दशलक्ष टन राहण्याचा अंदाज वर्तवण्यात आला आहे.






