सोमेश्वरनंतर भीमा, कर्मयोगी कारखान्यांच्या निवडणुकांकडे लक्ष!
पुणे जिल्ह्यातील सहकारी साखर कारखान्यांच्या निवडणुकांमुळे राजकीय घडामोडींना वेग
पुणे : पुणे जिल्ह्यातील सोमेश्वर सहकारी साखर कारखान्याची निवडणूक प्रक्रिया सुरू असतानाच भीमा आणि कर्मयोगी शंकरराव पाटील सहकारी साखर कारखान्यांच्या निवडणुकांकडेही लक्ष लागले आहे. या निवडणुकांच्या निमित्ताने जिल्ह्यातील आजी-माजी आमदारांची प्रतिष्ठा पणाला लागण्याची शक्यता आहे.
महितीनुसार, बारामतीतील सोमेश्वर कारखान्याच्या निवडणुकीसाठी उमेदवारी अर्ज मागे घेण्याची अंतिम तारीख ३० सप्टेंबर आहे. दौंड तालुक्यातील भीमा कारखान्याच्या संचालक मंडळाची मुदत संपली असून, त्याच्या निवडणुकीत आमदार राहुल कुल आणि माजी आमदार रमेश थोरात यांच्यातील राजकीय सामना रंगण्याची शक्यता वर्तवली जात आहे.
इंदापूर तालुक्यातील कर्मयोगी शंकरराव पाटील सहकारी साखर कारखान्याच्या निवडणुकीचीही तयारी सुरू आहे. सहकारी संस्था प्रतिनिधींचे ठराव पाठवण्यात आले असून प्रारूप मतदार यादी जाहीर होण्याची प्रतीक्षा आहे. या निवडणुकीच्या पार्श्वभूमीवर माजी मंत्री हर्षवर्धन पाटील आणि कृषिमंत्री दत्तात्रय भरणे यांच्या राजकीय भूमिकांकडे लक्ष असेल.
शेतकरी सभासद, ऊसतोडणी मजूर आणि वाहतूकदार यांचा साखर कारखान्यांशी जवळचा संबंध असल्याने या निवडणुकांना ग्रामीण राजकारणात महत्त्व आहे. भीमा आणि कर्मयोगी कारखान्यांच्या निवडणुकांचे कार्यक्रम जाहीर झाल्यानंतरच तेथील लढतींचे चित्र अधिक स्पष्ट होईल.
