आदिनाथ कारखान्याची निवडणूक जाहीर, १७ एप्रिलला मतमोजणी

करमाळा : तालुक्यातील आदिनाथ सहकारी साखर कारखान्याच्या निवडणुकीचा अखेर बिगुल वाजला असून, एप्रिल महिन्याच्या १७ तारखेला मतदान,  तर १९ एप्रिलला मतमोजणी होत आहे. १० मार्च ते  १९ एप्रिल २०२५पर्यंत ही निवडणूक प्रक्रिया चालणार असल्याची माहिती सहाय्यक निवडणूक निर्णय अधिकारी तथा तहसीलदार शिल्पा ठोकडे यांनी दिली. राज्य सहकारी संस्था निवडणूक प्राधिकरणाने  ०६ मार्च २०२५ रोजी राज्यातील संचालक मंडळाची मुदत संपलेल्या सहकारी संस्थांच्या निवडणूक प्रक्रिया सुरू करण्याबाबतचे आदेश दिले आहेत.

निवडणूक निर्णय अधिकारी तथा उपजिल्हाधिकारी अमोल भोसले (भू संपादन अधिकारी-१, सोलापूर) हे श्री आदीनाथ सहकारी साखर कारखान्याची निवडणूक पार पाडणार आहेत. भोसले यांनी एकूण सहा मतदारसंघातून २१ सदस्यांच्या निवडणुकीकरिता विविध टप्पे तयार केले असून,  १० ते दि. १७ मार्च २५ पर्यंत सकाळी ११ ते दुपारी ३ वाजेपर्यंत तहसील कार्यालय करमाळा येथे नामनिर्देशन पत्र दाखल करता येणार आहेत. दि. १८ मार्च रोजी छाननी प्रक्रिया होणार आहे.  १७ एप्रिल २०२५ रोजी सकाळी ८ ते सायं. ५ पर्यंत श्री आदिनाथ सहकारी साखर कारखान्याच्या संचालक मंडळासाठी मतदान घेण्यात येणार असून दि. १९ एप्रिल २५ रोजी सकाळी ८ वाजता मतमोजणीला सुरुवात होणार आहे. मतमोजणीनंतर त्याचदिवशी निकाल जाहीर करण्यात येणार आहे.

जेऊर, सालसे, पोमलवाडी, केम, रावगाव अशा पाच ऊस उत्पादक सभासद गटांतून प्रत्येकी ३ प्रमाणे एकूण १५ प्रतिनिधी तर उत्पादक सहकारी संस्था, बिगर उत्पादक संस्था व पणन संस्था प्रतिनिधी – १, अनु. जाती/अनु. जमाती प्रतिनिधी (१), महिला राखीव प्रतिनिधी (२), इतर मागासवर्गीय जाती प्रतिनिधी (१) व भटक्या वि. जाती व जमाती विशेष मागास प्रवर्ग (१) अशा एकूण ६ मतदार संघांतून एकूण २१ प्रतिनिधी या प्रक्रियेद्वारे निवडण्यात येणार आहेत.