Latest Sugar Industry News & Cooperative Sector Updates

विनापरवाना ऊस गाळप करणाऱ्या कारखान्यांवर कारवाईचा इशारा

07/10/2026

Dr. Sanjay Kolate is new Sugar Commissioner

पुणे : राज्यातील कोणत्याही साखर कारखान्याला २०२६-२७ च्या हंगामासाठी अद्याप ऊस गाळप परवाना देण्यात आलेला नाही. त्यामुळे विनापरवाना गाळप सुरू करणाऱ्या कारखान्यांचा अहवाल तातडीने साखर आयुक्तालयाकडे पाठवावा, अशा सूचना साखर आयुक्त डॉ. संजय कोलते यांनी सर्व प्रादेशिक साखर सहसंचालकांना दिल्या आहेत. विनापरवाना गाळप करणाऱ्या कारखान्यांवर दंडात्मक कारवाई करण्याचे संकेतही त्यांनी दिले.

आगामी गाळप हंगामाच्या तयारीचा आढावा घेण्यासाठी मंगळवारी, ६ ऑक्टोबर रोजी प्रादेशिक साखर सहसंचालकांसमवेत ऑनलाइन बैठक झाली. या बैठकीत डॉ. कोलते यांनी गाळप परवान्यांच्या प्रस्तावांचा आढावा घेतला आणि आवश्यक कार्यवाही तातडीने पूर्ण करण्यास सांगितले.

राज्यातील एकूण २१३ साखर कारखान्यांनी गाळप परवान्यासाठी ऑनलाइन प्रणालीद्वारे प्रादेशिक साखर सहसंचालक कार्यालयांकडे प्रस्ताव दाखल केले आहेत. त्यापैकी ११ प्रस्ताव साखर आयुक्तालयाकडे प्राप्त झाले आहेत. मंत्री समितीच्या बैठकीतील निर्णयानुसार ऊस कपातीच्या दराबाबतच्या सूचना यापूर्वीच देण्यात आल्या आहेत. त्यानुसार परिपूर्ण प्रस्ताव तातडीने आयुक्तालयाकडे पाठवावेत, असे निर्देश डॉ. कोलते यांनी दिले.

यंदाचा ऊस गाळप हंगाम १५ ऑक्टोबरपासून सुरू करण्याचा निर्णय मंत्री समितीच्या बैठकीत घेण्यात आला आहे. मात्र, गाळप परवाना मिळालेल्या कारखान्यांना त्यापूर्वीही हंगाम सुरू करता येईल. त्यासाठी सक्ती नसल्याची भूमिका साखर आयुक्तालयाने यापूर्वीच स्पष्ट केली आहे.

राज्यात यापूर्वीही विनापरवाना ऊस गाळपाचे प्रकार आढळले असून, संबंधित कारखान्यांवर दंडात्मक कारवाई करण्यात आली आहे. यंदाही असे प्रकार आढळल्यास प्रादेशिक सहसंचालकांच्या अहवालाच्या आधारे संबंधित कारखान्यांवर कारवाई केली जाणार आहे.