एनएसएल शुगरच्या सांडपाण्यामुळे भूजल दूषित
ग्रामस्थांचा आरोप; चौकशी आणि कडक कारवाईची मागणी
माजलगाव : माजलगाव तालुक्यातील पवारवाडी येथील एनएसएल शुगर कारखान्यातून सोडण्यात येणाऱ्या रासायनिक मिश्रित सांडपाण्यामुळे भूजल दूषित झाल्याचा गंभीर आरोप ग्रामस्थांनी केला आहे.
कारखान्याची प्रक्रिया करताना शेतीसाठी सोडले जाणारे सांडपाणी निपाणी टाकळी, हनुमान नगर तांडा आणि परिसरात सोडले जात असल्याने येथील भूजल प्रदूषित झाले आहे. यामुळे परिसरातील नागरिकांच्या आरोग्यास धोका निर्माण झाला आहे, असा आरोप गरीब पोलिस बँड्ज असोसिएशनचे धारूर तालुकाध्यक्ष बाळासाहेब सोनटक्के आणि माजलगाव तालुकाध्यक्ष हरीश जाधव यांनी केला.
त्यांनी यासंदर्भात जिल्हाधिकारी कार्यालयात निवेदन सादर करून तातडीने चौकशी करून दोषींवर कडक कारवाई करण्याची मागणी केली आहे.
निवेदनातील ठळक मुद्दे:
- पाणी पिण्यास अयोग्य : कारखान्यातून येणाऱ्या रासायनिक सांडपाण्यामुळे जमिनीत मुरल्याने परिसरातील बोअरवेल, विहिरी आणि पिण्याच्या पाण्याचे स्रोत दूषित झाले आहेत. बोअरवेलमधून निघणारे काळपट, पिवळसर आणि दुर्गंधीयुक्त पाणी पिण्यासह घरगुती वापरासाठीही अयोग्य आहे.
- आरोग्यावर परिणाम : दूषित पाण्यामुळे नागरिकांना पोटाचे विकार, त्वचारोग आणि इतर संसर्गजन्य आजारांचा सामना करावा लागत आहे. औषधोपचारावरील खर्च वाढल्याने अनेक कुटुंबांवर आर्थिक ताण पडला आहे.
- जीवितहानीचा दावा : दूषित पाण्यामुळे काही जनावरांचा मृत्यू झाल्याचा आणि एका शेतकऱ्याचा मानसिक तणावातून हृदयविकाराच्या झटक्याने मृत्यू झाल्याचाही दावा निवेदनात करण्यात आला आहे.
- प्रशासनाकडे तक्रारीकडे दुर्लक्ष : यापूर्वी तहसील कार्यालयासह संबंधित प्रशासनाकडे अनेकदा तक्रारी करूनही कोणतीही ठोस कारवाई झालेली नाही.
जिल्हा सार्वजनिक आरोग्य प्रयोगशाळेने केलेल्या तपासणीत देखील हे पाणी पिण्यास अयोग्य असल्याचे निष्कर्षात म्हटले आहे, असेही ग्रामस्थांनी निवेदनात नमूद केले.
ग्रामस्थांच्या मागण्या
ग्रामस्थांनी संपूर्ण प्रकरणाची उच्चस्तरीय चौकशी करून पाणी नमुन्यांची नव्याने तपासणी करावी अशी मागणी केली आहे. दोषी आढळल्यास संबंधित एनएसएल शुगर कारखान्यावर कायद्याने कारवाई करावी. तसेच परिसरातील नागरिकांना तातडीने सुरक्षित पिण्याच्या पाण्याची व्यवस्था उपलब्ध करून द्यावी.
अन्यथा जिल्हाधिकारी कार्यालयासमोर आमरण उपोषण करण्याचा इशारा बाळासाहेब सोनटक्के व हरीश जाधव यांनी दिला आहे.
