ऊस कमी, कारखाने अधिक; सांगलीत गाळपासाठी वाढणार स्पर्धा

सांगली : कमी पाऊस आणि काही भागांत हुमणी व लोकरी माव्याच्या प्रादुर्भावामुळे यंदा उसाची अपेक्षित वाढ झालेली नाही. जिल्ह्यातील अनेक साखर कारखान्यांची गाळप क्षमता वाढली असली, तरी ऊस उत्पादनात त्यानुसार वाढ होण्याची शक्यता कमी आहे. त्यामुळे आगामी गळीत हंगामात कारखान्यांना पुरेसा ऊस मिळवण्यासाठी कसरत करावी लागू शकते.

सांगली जिल्ह्यातील कारखान्यांबरोबरच लगतच्या कोल्हापूर आणि कर्नाटक भागातील कारखानेही उसाच्या गाळपासाठी प्रयत्नशील असतात. यंदा राज्य सरकारने कारखानदारांना १५ ऑक्टोबरपासून गळीत हंगाम सुरू करण्याचे आवाहन केले आहे. उपलब्ध ऊस कमी पडल्यास कारखान्यांमध्ये ऊस मिळवण्यासाठी स्पर्धा वाढण्याची शक्यता व्यक्त होत आहे.

मागील वर्षी गाळप झालेल्या उसाला प्रतिटन आणखी २०० रुपये द्यावेत, अशी मागणी शेतकरी संघटनांनी केली होती. आगामी हंगामात उसाला चांगला दर मिळेल, अशी उत्पादकांना अपेक्षा आहे. मात्र कमी पावसामुळे काही भागांत विहिरींची पाणीपातळी आताच खालावली असून, त्याचाही पुढील ऊस उत्पादनावर परिणाम होऊ शकतो.

पहिल्या उचलीकडे लक्ष : वाळवा तालुका हा जिल्ह्यातील महत्त्वाचा ऊस उत्पादक पट्टा आहे. येथील ऊस अनेक कारखान्यांकडे गाळपासाठी जात असल्याने प्रमुख कारखाने पहिली उचल किती जाहीर करतात, याकडे ऊस उत्पादकांचे लक्ष लागले आहे.