साखर उद्योगाला दिलासा : कच्च्या साखरेच्या आयात नियमात बदल

नवी दिल्ली : केंद्र सरकारने शुल्कमुक्त कच्च्या साखरेच्या आयात आणि विक्रीसाठीच्या अटींमध्ये महत्त्वाची सुधारणा केली आहे. नव्या नियमानुसार आता आयात केलेल्या कच्च्या साखरेवर प्रक्रिया करून ती देशांतर्गत बाजारात विकण्यासाठी दोन महिन्यांची मुदत मिळणार आहे.यापूर्वी टॅरिफ रेट कोटा (TRQ) अंतर्गत आयात केलेल्या कच्च्या साखरेवर प्रक्रिया करून ती 31 ऑक्टोबरपर्यंत देशांतर्गत बाजारात विकणे बंधनकारक होते. मात्र, उद्योगाने मुदतीबाबत चिंता व्यक्त केल्यानंतर सरकारने हा निर्णय घेतला आहे.

परराष्ट्र व्यापार महासंचालनालयाने (DGFT) 20 ऑगस्ट रोजी जारी केलेल्या अधिसूचनेनुसार, आता कच्ची साखर दोन महिन्यांच्या आत पांढऱ्या किंवा शुद्ध साखरेमध्ये रूपांतरित करून देशांतर्गत बाजारात विकता येईल. आयातीसाठीची 31 ऑक्टोबरची अंतिम तारीख मात्र कायम ठेवण्यात आली आहे.ब्राझीलमधून भारतात कच्ची साखर पोहोचण्यासाठी साधारण 40-45 दिवस लागतात. त्यात बंदरावरील हाताळणी, रिफायनरीपर्यंत वाहतूक आणि इतर आयात प्रक्रिया यामुळे आणखी वेळ जातो. त्यामुळे साखरेवर प्रक्रिया सुरू होण्यास विलंब होत होता.

माल पोहोचल्यानंतर कारखान्यांना कच्च्या साखरेचे पांढऱ्या साखरेत रूपांतर करून ती बाजारात आणण्यासाठी वेळ लागतो. ही अडचण लक्षात घेऊन ‘अॅडव्हान्स ऑथोरायझेशन स्कीम’ अंतर्गत शुल्क न भरता कच्ची साखर आयात करण्याची मुभा देण्यात आली आहे.या निर्णयामुळे साखर उद्योगाला मोठा दिलासा मिळाला आहे.