ऊस वाहतूक रोखली; स्वाभिमानी संघटनेचा कारखानदारांना इशारा
सांगली : चालू गळीत हंगामाच्या पार्श्वभूमीवर ऊसदराच्या प्रश्नावरून वाळवा तालुक्यात स्वाभिमानी शेतकरी संघटना आक्रमक झाली आहे. कारखाने सुरू करण्यापूर्वी ऊस उत्पादकांना योग्य दर जाहीर करावा, अशी मागणी संघटनेने केली आहे.
उदगीरी शुगर, पारे (ता. खानापूर) या कारखान्याकडे ऊस वाहतूक करणाऱ्या ट्रॅक्टरमधील हवा सोडून ऊस वाहतूक रोखण्यात आली. प्रलंबित ऊस बिलाची पहिली उचल मिळाल्याशिवाय कारखाने सुरू करू नयेत, असा इशारा संघटनेच्या कार्यकर्त्यांनी दिला.
कारसेगाव-मालखेड परिसरात सुमारे पाच ते सहा ट्रॅक्टरमधून सुरू असलेली ऊस वाहतूक रोखण्यात आली. उदगीरी शुगरने गेल्या दोन दिवसांपासून गळीत हंगाम सुरू केला आहे. मात्र, कारखाना प्रशासनाने संघटनेच्या मागण्यांकडे दुर्लक्ष केल्याचा आरोप कार्यकर्त्यांनी केला.
संघटनेने १० ऑक्टोबर रोजी होणाऱ्या ऊस परिषदेकडे लक्ष वेधले असून, या परिषदेत ऊसदराचा निर्णय घेण्यात येणार आहे. ऊस उत्पादन खर्चात मोठी वाढ झाली असून शेतकऱ्यांना त्यांच्या उत्पादनाचा योग्य मोबदला मिळणे आवश्यक आहे, अशी भूमिका संघटनेने मांडली.
साखरेला बाजारात चांगला दर मिळत असतानाही ऊस उत्पादकांना योग्य दर देण्याबाबत साखर कारखानदारांकडून टाळाटाळ होत असल्याचा आरोप संघटनेने केला आहे. मागण्या मान्य न झाल्यास आंदोलन अधिक तीव्र करण्याचा इशाराही देण्यात आला आहे.
