राजारामबापू कारखान्याच्या अध्यक्षपदी प्रतीक पाटील
सांगली : राजारामबापू सहकारी साखर कारखान्याच्या अध्यक्षपदी प्रतीक जयंतराव पाटील यांची शुक्रवारी बिनविरोध निवड झाली. नूतन संचालक मंडळाच्या बैठकीमध्ये उपाध्यक्षपदी विजयराव पाटील यांची निवड करण्यात आली.
नुकत्याच झालेल्या संचालक मंडळाच्या निवडणुकीत २१ संचालकांची बिनविरोध झाली होती. स्व. राजारामबापू पाटील यांनी स्थापन केलेल्या या साखर कारखान्याचे चार विभाग कार्यरत असून गेली ३७ वर्षे या कारखान्याची धुरा माजी मंत्री तथा राष्ट्रवादी काँग्र्रेसचे प्रदेशाध्यक्ष आमदार जयंत पाटील यांच्या हाती होती.
माजी अध्यक्ष पी. आर. पाटील यांनी समर्थपणे कारखान्याचे अध्यक्षपद सांभाळले होते. आता युवा नेतृत्वाकडे कारखान्याची सूत्रे देण्याचे निश्चित करून तरूण नेतृत्वाला संधी देण्यासाठी आमदार पाटील यांनी सहकारातून निवृत्ती घेत कारखान्याची सूत्रे पुत्र प्रतीक यांच्या हाती सोपविण्याचा निर्णय घेतला होता.
जिल्हा उपनिबंधक मंगेश सुरवसे यांच्या अध्यक्षतेखाली नूतन संचालक मंडळाची अध्यक्ष, उपाध्यक्ष निवडीसाठी बैठक पार पडली. अध्यक्षपदासाठी संचालक कार्तिक पाटील यांनी प्रतीक पाटील यांचे नाव सुचविले, तर रघुनाथ जाधव यांनी अनुमोदन दिले.
उपाध्यक्षपदासाठी विजयराव पाटील यांचे नाव देवराज पाटील यांनी सुचविले, तर बाळासाहेब पवार यांनी अनुमोदन दिले. अध्यक्षपदी निवड होताच पाटील यांनी कारखाना कार्यस्थळावर असलेल्या स्व. राजारामबापू पाटील यांच्या पुतळ्यास पुष्पहार अर्पण करून अभिवादन केले. नंतर कार्यकर्त्यांनी गुलालाची उधळण करीत आनंदोत्सव साजरा केला.
