पश्चिम महाराष्ट्रात हंगामाला अपेक्षित वेगाची प्रतीक्षा!

राज्यात ७५ साखर कारखान्यांत गाळप सुरू; २६ लाख टन उसाचे गाळप पूर्ण

पुणे : राज्यातील ऊस गाळप हंगामाला सुरुवात झाली असून, आतापर्यंत ७५ साखर कारखान्यांनी सुमारे २६ लाख टन उसाचे गाळप पूर्ण केले आहे. यामध्ये ३३ सहकारी आणि ४२ खासगी कारखान्यांचा समावेश आहे. राज्याचा सरासरी साखर उतारा ६.४० टक्के नोंदविण्यात आला आहे.

यंदाच्या हंगामासाठी राज्यातील २१२ साखर कारखान्यांनी गाळप परवान्यासाठी अर्ज केले आहेत. त्यात १०४ सहकारी आणि १०८ खासगी कारखान्यांचा समावेश आहे. साखर आयुक्तालयाकडून परवाने देण्याची प्रक्रिया सुरू असून, आवश्यक शुल्क भरलेल्या कारखान्यांना गाळपाची परवानगी दिली जात आहे.

विभागनिहाय पाहता, कोल्हापूर, पुणे, सोलापूर, अहिल्यानगर, छत्रपती संभाजीनगर, नांदेड आणि अमरावती विभागांतील कारखान्यांनी गाळप सुरू केले आहे. नागपूर विभागात मात्र अद्याप गाळप सुरू झालेले नाही.

दरम्यान, पश्चिम महाराष्ट्रातील काही भागांत ऊसदराचा प्रश्न अद्याप सुटलेला नाही. विशेषतः कोल्हापूर विभागात दरवाढीच्या मागणीमुळे कारखाने सुरू होण्यास विलंब होत असून, गाळप हंगामाला अपेक्षित गती मिळालेली नाही.

साखरेच्या किमान विक्रीदरवाढीच्या निर्णयाकडे लक्ष

हंगाम सुरू होताच साखरेच्या किमान विक्रीदरात वाढ करण्याची मागणी पुन्हा पुढे आली आहे. या मागणीसाठी साखर उद्योगातील संघटनांनी केंद्रीय सहकारमंत्री अमित शहा यांची भेट घेतली आहे. केंद्र सरकार याबाबत कोणता निर्णय घेणार, याकडे साखर उद्योगाचे लक्ष लागले आहे.