‘एआय’ उसाला वरदान ठरणार : बिपीन कोल्हे

अहिल्यानगर : ‘एआय’ तंत्रज्ञानामुळे सर्व क्षेत्रांत मोठे फेरबदल होण्याची भीती व्यक्त केली जाते. त्यावर जगभर मंथन सुरू आहे. मात्र, ‘एआय’ तंत्रज्ञान ऊस पिकाला वरदान ठरणार आहे. उत्पादन खर्च आणि पाण्याचा वापर कमी आणि उत्पादनात भरीव वाढ अशी किमया या तंत्रज्ञानाने ऊसशेतीत करून दाखविली आहे. दरम्यान, शेतकऱ्यांनी ‘इफ्को ‘च्या नॅनो खताबरोबरच ऊस पिकासाठी, कृत्रिम बुद्धिमत्तेचाही प्रभावी वापर करून उत्पादन वाढवावे. हे नवे तंत्रज्ञान अधिकाऱ्यांनी शेतकऱ्यांच्या बांधावर पोहोचवावे, असे मत कोपरगाव येथील संजीवनी उद्योग समूहाचे अध्यक्ष बिपिन कोल्हे यांनी व्यक्त केले. ‘इफ्को’ आणि संजीवनी ग्रुपच्या सहकार्याने राहाता येथे आयोजित केलेल्या राज्यव्यापी ऊस पीक परिसंवादात मार्गदर्शन करताना ते बोलत होते.  या परिसंवाद मेळाव्यामध्ये राज्यभरातील विविध साखर कारखान्यांच्या जवळपास दोनशे प्रतिनिधींनी त्यात सहभाग घेतला.

‘इफ्को ‘चे राज्य विपणन व्यवस्थापक यू. आर. तिजारे म्हणाले, की राज्यातील ३६ हजार सहकारी संस्थांच्या माध्यमातून ‘इफ्को आणि शेतकऱ्यांचे ५८ वर्षांचे नाते आहे. जगभर विविध खते व शेतीविषयक कीडनाशके यावर संशोधन सुरू आहे. पाणी आणि खतांच्या अधिक वापरामुळे जमिनीचा पोत दिवसेंदिवस कमी होत आहे.

‘इफ्को’चे (पुणे) वरिष्ठ विपणन डॉ. एम. एस. बोवार यांनी ऊसपीक खत व्यवस्थापनामध्ये ‘इफ्को’च्या नॅनो खतांचा वापर या विषयावर सखोल मार्गदर्शन केले, तर ऊस उत्पादन व साखर उताऱ्यात वाढ यासाठी एआय कृत्रिम बुद्धिमत्तेचा प्रभावी वापर याविषयी मृदा शास्त्र कृषी विज्ञान केंद्र बारामतीचे विशेषज्ञ डॉ. विवेक भोईटे, वसंतदादा शुगर इन्स्टिट्यूटचे (पुणे) पीक उत्पादन व संरक्षणातील प्रमुख शास्त्रज्ञ डॉ. ए. डी. कडलग यांनी मार्गदर्शन केले.

‘इफ्को’ एम. सी.चे (पुणे) विभागीय विपणन व्यवस्थापक दौलतराव बोरस्ते यांनी ऊस रोग व कीड व्यवस्थापन विषयावर मार्गदर्शन केले. ‘इफ्को’चे अधिकारी वैभव ढेपे, तुषार गोरडे यांनी सूत्रसंचालन केले.

‘संजीवनी’चे केन मॅनेजर जी. बी. शिंदे, ऊस विकास अधिकारी शिवाजीराव देवकर,  सी. एन. वल्टे यांनी विशेष परिश्रम घेतले. प्रारंभी सहकारमहर्षी शंकरराव कोल्हे सहकारी साखर कारखान्याचे साखर सरव्यवस्थापक शिवाजीराव दिवटे यांनी उपस्थितांचे स्वागत केले.