नव्या गाळप हंगामाच्या तोंडावर शेतकऱ्यांची १७५ कोटींची एफआरपी थकीत

पुणे : राज्यातील नव्या ऊस गाळप हंगामाला १५ ऑक्टोबरपासून सुरुवात होणार असताना, मागील २०२५–२६ हंगामातील शेतकऱ्यांची सुमारे १७५ कोटी रुपयांची रास्त आणि किफायतशीर किंमत (एफआरपी) अद्याप थकीत आहे. ही रक्कम २५ साखर कारखान्यांकडे बाकी असल्याने नव्या हंगामापूर्वी शेतकऱ्यांना त्यांच्या उसाचे पैसे मिळणार का, याकडे लक्ष लागले आहे.
मागील हंगामात ऊसतोडणी आणि वाहतूक खर्चासह एफआरपीची एकूण देय रक्कम ४० हजार ४४६ कोटी रुपये होती. त्यापैकी कारखान्यांनी ४० हजार २७१ कोटी रुपये शेतकऱ्यांच्या बँक खात्यांमध्ये जमा केले आहेत. एकूण देय रकमेच्या तुलनेत प्रत्यक्ष अदा केलेल्या रकमेचे प्रमाण ९९.५७ टक्के आहे. मात्र, उर्वरित १७५ कोटी रुपयांची देणी अद्याप प्रलंबित आहेत.
जवळपास १८५ साखर कारखान्यांनी एफआरपीची रक्कम अदा केली असून, २५ कारखान्यांकडील देणी बाकी आहेत. संबंधित कारखान्यांच्या सुनावण्या घेऊन थकीत रक्कम येत्या पंधरवड्यात शेतकऱ्यांच्या खात्यांमध्ये जमा करून घेण्यासाठी साखर आयुक्तालय कोणती पावले उचलणार, असा प्रश्न उपस्थित होत आहे.
थकीत एफआरपीच्या प्रकरणांमध्ये सुनावणीनंतरही पैसे न दिलेल्या १५ साखर कारखान्यांविरुद्ध महसुली वसुली प्रमाणपत्रानुसार (आरआरसी) जप्तीची कारवाई करण्याचे आदेश साखर आयुक्त डॉ. संजय कोलते यांनी वेळोवेळी दिले आहेत. या आदेशांनंतर प्रत्यक्ष वसुली होऊन शेतकऱ्यांना किती लवकर पैसे मिळतात, हे महत्त्वाचे ठरणार आहे.






