उसाला चांगला भाव, महागाई वाढणार; फरांडे महाराजांची भाकणूक!

जयसिंगपूर : उसाच्या रसभांडाला चांगला भाव मिळेल, तसेच मिरची आणि तंबाखूचे दर वाढतील. देशात महागाई भडकेल आणि मोठ्या घडामोडी घडतील, अशी भाकणूक खोलोबा वाघमोडे फरांडे महाराज यांनी उदगाव येथील श्री महादेवी मंदिराच्या प्रांगणात केली.

पुढील वर्षी रोहिणीचा पाऊस आणि मृगाची पेर होईल. वर्ष सुख-समाधानाचे जाईल, असेही त्यांनी भाकणुकीत सांगितले.

सोलापूर जिल्ह्यातील अंजनगाव येथील श्री खोलोबा देवस्थानची पट्टणकोडोलीकडे जाणारी पायी दिंडी रविवारी सायंकाळी उदगावमध्ये पोहोचली. ग्रामपंचायतीच्या वतीने महाराजांचे पुष्पहार घालून स्वागत करण्यात आले आणि ग्रामस्थांच्या वतीने शिधा देण्यात आला.

श्री विठ्ठल-बिरदेव यात्रेनिमित्त निघालेली ही दिंडी गुरुवारी उदगावला पोहोचली होती. परंपरेप्रमाणे महाराजांनी महादेवी मंदिराच्या प्रांगणात भाकणूक केली. त्यानंतर दिंडी पुढे रवाना झाली. मार्गावर ठिकठिकाणी भाविकांनी महाराजांच्या पूजेसाठी गर्दी केली होती.