एआयच्या मदतीने उस शेतीत क्रांती

जयंंत पाटील : एकरी १५० टन उत्पादनाचा दावा

सांगली : कृत्रिम बुद्धिमत्ता (AI) आधारित तंत्रज्ञानाचा उस शेतीत प्रभावी वापर केल्यास एकरी १५० टनांपेक्षा अधिक उत्पादन घेणे शक्य असल्याचे प्रतिपादन आमदार जयंंत पाटील यांनी केले. ईश्वरपूर येथे आयोजित शेतकरी सन्मान सोहळ्यात ते बोलत होते. या वेळी त्यांनी सांगितले की, हवामान, मातीची स्थिती, पाणी व्यवस्थापन आणि खतांचा अचूक वापर यासाठी AI तंत्रज्ञानाचा उपयोग केल्यास उत्पादनात मोठी वाढ होऊ शकते. उस शेतीत आधुनिक तंत्रज्ञानाचा अवलंब करणे ही काळाची गरज असून शेतकऱ्यांनी त्याकडे सकारात्मक दृष्टीने पाहावे, असेही त्यांनी आवाहन केले.

ईश्वरपूर येथे सांगली जिल्हा परिषद व वाळवा पंचायत समितीच्या संयुक्त विद्यमाने लोकनेते राजारामबापू पाटील व लोकशाहीर अण्णाभाऊ साठे यांची जयंती तसेच कृषी पंधरवड्यानिमित्त आयोजित शेतकरी सन्मान सोहळा व एकरी १५० टन ऊस उत्पादन कार्यशाळेच्या उद्घाटन कार्यक्रमात ते बोलत होते.

जिल्हा परिषद अध्यक्षा संगीता पाटील, कृषी व पशु संवर्धन सभापती सावित्री रविपाटील, पंचायत समितीचे सभापती उदयसिंह पाटील, उपसभापती प्रकाश पाटील, कृषी विकास अधिकारी मनोजकुमार वेताळ, गटविकास अधिकारी डॉ. आबासाहेब पवार, शिरीष माने, तालुका कृषी अधिकारी इंद्रजीत चव्हाण उपस्थित होते.

यावेळी उपस्थित मान्यवरांनी शेतकऱ्यांना नवीन तंत्रज्ञान स्वीकारण्याचे आवाहन करत उत्पादन खर्च कमी करून उत्पन्न वाढविण्यावर भर दिला. कार्यक्रमात अनेक प्रगतिशील शेतकऱ्यांचा गौरव करण्यात आला.

शेतकऱ्यांचा सन्मान

यावेळी विनोद तोडकर (कासेगाव), अशोक खोत (ईश्वरपूर), प्रतीक पाटील (साखराळे), पंजाबराव पवार (रेठरे हरणाक्ष), शोभा पाखले (बोरगाव), अमृत कलश महिला शेतकरी कृषी स्वयंसहाय्यता बचत गट (बोरगाव), अमृतधारा महिला उत्पादक गट (गाताडवाडी) यांच्यासह जिल्हा परिषदेच्या ११ गटांतील ७५ प्रयोगशील शेतकऱ्यांचा सत्कार करण्यात आला.