माजी साखर आयुक्त शेखर गायकवाड माळेगाव साखर कारखान्याचे मार्गदर्शक

पुणे।
माळेगाव सहकारी साखर कारखान्याच्या प्रशासनात अधिक पारदर्शकता आणण्यासाठी आणि कार्यक्षम व्यवस्थापनाद्वारे कारखान्याच्या वैभवात भर घालण्यासाठी एक महत्त्वपूर्ण पाऊल उचलण्यात आले आहे. राज्याचे माजी साखर आयुक्त शेखर गायकवाड यांना कारखान्याच्या कामकाजात मार्गदर्शनाची जबाबदारी देण्याचा धोरणात्मक निर्णय रविवारी घेण्यात आला. अशा प्रकारे माजी साखर आयुक्तांकडे कारखान्याने महत्त्वाची जबाबदारी सोपवण्यासाठी ही पहिलीच घटना आहे.

शेखर गायकवाड हे सध्या ‘यशदा’चे अति. महासंचालक आहेत. त्यांची महाराष्ट्र लोकसेवा आयोगाच्या अभ्यास गटांवर अलीकडेच नेमणूक झाली आहे. साखर आयुक्तपदी काम करताना, त्यांच्या उत्तम कार्यशैलीचा अनुभव साखर क्षेत्राने घेतला आहे.

अनुभवी नेतृत्वाचा लाभ:
कारखान्याच्या अध्यक्षा आणि राज्याच्या उपमुख्यमंत्री सुनेत्रा पवार यांच्या अध्यक्षतेखाली झालेल्या संचालक मंडळाच्या बैठकीत शेखर गायकवाड यांच्या नियुक्तीला एकमताने मंजुरी देण्यात आली. गायकवाड यांनी साखर आयुक्त म्हणून काम करताना या उद्योगात केलेले उल्लेखनीय कार्य आणि त्यांचा प्रदीर्घ अनुभव कारखान्याच्या प्रगतीसाठी आणि सभासद ऊस उत्पादक शेतकऱ्यांच्या आर्थिक लाभासाठी अत्यंत उपयुक्त ठरेल, असा विश्वास सुनेत्रा पवार यांनी यावेळी व्यक्त केला. या बैठकीला उपाध्यक्षा संगीता कोकरे, ज्येष्ठ संचालक बाळासाहेब तावरे यांच्यासह अन्य संचालक उपस्थित होते.

शेतकऱ्यांच्या खात्यावर २०० रुपयांचा बोनस:
कारखान्याने केवळ प्रशासकीय सुधारणांवरच भर दिला नाही, तर शेतकऱ्यांना थेट आर्थिक दिलासाही दिला आहे. ऊस लागवडीला प्रोत्साहन देण्यासाठी आणि शेतीपूरक उपक्रमांना बळ देण्यासाठी सभासद शेतकऱ्यांच्या खात्यावर प्रति टन २०० रुपयांचे ‘कांडे पेमेंट’ वर्ग करण्यात आले आहे. या निर्णयामुळे ऐनवेळी शेतकऱ्यांच्या हातात पैसा आल्याने सभासदांमध्ये आनंदाचे वातावरण आहे.

शेतकऱ्यांकडून स्वागत आणि सत्कार:
कारखान्याच्या या शेतकरीभिमुख निर्णयांचे स्वागत करण्यासाठी अनेक शेतकऱ्यांनी अध्यक्षा सुनेत्रा पवार आणि संचालक मंडळाचा पुष्पगुच्छ देऊन सत्कार केला. माजी सभापती अविनाश गोफणे, संजय जगताप, शेतकरी संघटनेचे सुखदेव जाधव, सदाशिव ढवळे आणि माऊली कदम यांसारख्या प्रमुख शेतकऱ्यांनी या निर्णयाबद्दल समाधान व्यक्त केले आहे.

पारदर्शकतेचे नवे मॉडेल:
माळेगाव कारखान्याने एका बाजूला शेखर गायकवाड यांच्यासारख्या अनुभवी प्रशासकाची मदत घेणे आणि दुसऱ्या बाजूला शेतकऱ्यांना थेट आर्थिक लाभ देणे, या दुहेरी धोरणामुळे कारखान्याच्या कार्यपद्धतीला एक नवी दिशा मिळाली असल्याची चर्चा सध्या सभासदांमध्ये सुरू आहे. यामुळे कारखान्यातील पारदर्शकता वाढून तो एक आदर्श सहकारी संस्था म्हणून पुढे येईल, अशी अपेक्षा व्यक्त केली जात आहे.