विघ्नहर कारखाना गाळपासाठी सज्ज! १० लाख टन ऊस गाळपाचे नियोजन
पुणे | शुगरटुडे
निवृतीनगर येथील श्री विघ्नहर सहकारी साखर कारखान्याच्या सन २०२६-२७ च्या गळीत हंगामाचा ४१ वा बॉयलर अग्निप्रदीपन कारखान्याचे संचालक श्री.बाळासाहेब पांडुरंग घुले व त्यांच्या सुविद्य पत्नी सौ.वंदनाताई बाळासाहेब घुले या उभयतांच्या हस्ते कारखाना कार्यस्थळी उत्साहपूर्ण वातावरणात पार पडला.
यंदाचा गळीत हंगाम चालू करण्यासाठी सर्व मशिनरी देखभाल व दुरुस्तीची कामे पूर्ण झाली असून यानिमित्ताने विघ्नहर कारखाना गाळपासाठी सज्ज झाला आहे.
येत्या १५ ऑक्टोबरपासून चालू होणाऱ्या गळीत हंगामात १० लाख मेट्रिक टन ऊस गाळप करण्याचे सुयोग्य नियोजन केले असून, हार्वेस्टर, ऊसतोडणी मजूर, गाडी सेंटर, डोके सेंटर तसेच टायर गाड्यांबाबतचे आवश्यक करार पूर्ण झाले आहेत. या हंगामातही नेहेमीप्रमाणे सर्व सभासद, ऊस उत्पादक शेतकऱ्यांनी विघ्नहर कारखान्यास जास्तीत जास्त ऊस गाळपास देवून सहकार्य करावे, ही विनंती.
या कार्यक्रम प्रसंगी कारखान्याचे व्हाईस चेअरमन अशोकशेठ घोलप, सर्वश्री संचालक मंडळ, सुमित्राताई शेरकर, कार्यकारी संचालक भास्कर घुले, सर्व विभागाचे अधिकारी, कामगार युनियन, सेवक पतसंस्था, सांस्कृतिक मंडळाचे सर्व पदाधिकारी, सदस्य आणि सर्व कर्मचारी, कामगार उपस्थित होते.
साखर उत्पादनात घट झाल्यास उसापासून इथेनॉल निर्मितीवरील निर्बंधांचा केंद्र सरकारने पुनर्विचार करावा, अशी मागणीही शेरकर यांनी केली.
