ऊसदरासाठी स्वाभिमानी आक्रमक; उसाचे ट्रॅक्टर रोखले

मिरज : उसाचा दर जाहीर करावा, या मागणीसाठी स्वाभिमानी शेतकरी संघटनेने सांगली जिल्ह्यात आंदोलन सुरू केले आहे. भोसे फाट्याजवळ राष्ट्रीय महामार्गावर संघटनेच्या कार्यकर्त्यांनी उसाची वाहतूक करणारे ९८ हून अधिक ट्रॅक्टर रोखले. त्यामुळे महामार्गालगत ऊसवाहू वाहनांच्या लांब रांगा लागल्या.

राजू शेट्टी यांचे पुत्र सौरभ शेट्टी यांच्या नेतृत्वाखाली शेतकरी आणि कार्यकर्ते या आंदोलनात सहभागी झाले. उसाचा पहिला हप्ता आणि अंतिम दर निश्चित झाल्याशिवाय ऊस वाहतूक सुरू होऊ देणार नाही, अशी भूमिका आंदोलकांनी घेतली.शेतकऱ्यांच्या मागण्यांकडे दुर्लक्ष झाल्यास आंदोलन आणखी तीव्र करण्याचा इशाराही संघटनेने दिला.

गाळप हंगामाच्या सुरुवातीलाच ऊसदराचा प्रश्न ऐरणीवर आल्याने साखर कारखान्यांकडून कोणती भूमिका घेतली जाते, याकडे शेतकऱ्यांचे लक्ष लागले आहे.दराचा निर्णय होईपर्यंत शेतकऱ्यांनी ऊसतोड घेऊ नये आणि आंदोलनाला साथ द्यावी, असे आवाहन सौरभ शेट्टी यांनी केले. संघटनेचे नेते राजू शेट्टी यांच्यासोबत ऊसदराच्या मागणीसाठी ठामपणे उभे राहण्याचे आवाहनही त्यांनी केले.