सोमेश्वरच्या सत्तेचा फैसला आज; ८३ उमेदवारांचे भवितव्य मतपेटीत बंद

पुणे : श्री सोमेश्वर सहकारी साखर कारखान्याच्या पंचवार्षिक निवडणुकीसाठी रविवारी (११ ऑक्टोबर) शांततेत मतदान पार पडले. निवडणुकीत सरासरी ७५ टक्क्यांपेक्षा अधिक मतदान झाल्याचा प्राथमिक अंदाज आहे. तीन पॅनेलमधील एकूण ८३ उमेदवारांचे भवितव्य मतपेटीत बंद झाले असून, सोमवारी (१२ ऑक्टोबर) होणाऱ्या मतमोजणीकडे राज्यातील राजकीय आणि सहकार क्षेत्राचे लक्ष लागले आहे.

राज्यात सर्वाधिक ऊसदर देणाऱ्या कारखान्यांपैकी एक म्हणून सोमेश्वर कारखान्याची ओळख आहे. त्यामुळे या निवडणुकीला विशेष महत्त्व प्राप्त झाले आहे. तिन्ही पॅनेलची प्रतिष्ठा पणाला लागल्याने प्रचारादरम्यान पॅनेलप्रमुख, उमेदवार आणि कार्यकर्त्यांनी सभासदांपर्यंत पोहोचण्यासाठी प्रयत्न केले. मतदानाच्या दिवशीही मतदारांना केंद्रांपर्यंत आणण्यासाठी कार्यकर्त्यांची धावपळ सुरू होती.

रविवारी सकाळी आठ वाजता मतदानाला सुरुवात झाली. दिवसभर अनेक केंद्रांवर मतदारांच्या रांगा दिसून आल्या. मतपत्रिकेवर शिक्का मारण्याच्या प्रक्रियेला वेळ लागत असल्याने काही ठिकाणी सभासदांना बराच वेळ प्रतीक्षा करावी लागली. प्रत्येक उमेदवाराच्या चिन्हावर शिक्का मारताना घाई करू नये, असे आवाहनही मतदारांनी केले.

सायंकाळी पाच वाजता मतदानाची निर्धारित वेळ संपल्यानंतर केंद्रांवर उपस्थित असलेल्या सभासदांना मतदानाची संधी देण्यात आली. त्यामुळे काही ठिकाणी मतदानाची प्रक्रिया उशिरापर्यंत सुरू राहिली. सर्व मतपेट्यांची नोंद आणि आवश्यक पडताळणी पूर्ण झाल्यानंतर मतदानाची अंतिम टक्केवारी स्पष्ट होईल, अशी माहिती निवडणूक निर्णय अधिकारी दिग्विजय आहेर यांनी दिली.

सोमेश्वर विकास पॅनेलचे प्रमुख पुरुषोत्तम जगताप यांनी सभासदांनी उत्स्फूर्त मतदान केल्याचे सांगत विजयाचा विश्वास व्यक्त केला. कारखान्याच्या विकासासाठी घेतलेले निर्णय आणि सभासदांच्या हिताची कामे मतदार लक्षात घेतील, असे त्यांनी म्हटले. श्री सोमेश्वर शेतकरी विकास पॅनेलचे प्रमुख युगेंद्र पवार यांनीही आपल्या पॅनेलला चांगले यश मिळेल, असा विश्वास व्यक्त केला.

निवडणुकीच्या निकालातून कारखान्याच्या सत्तेचे चित्र स्पष्ट होणार आहे. त्यामुळे सभासद, कार्यकर्ते आणि राजकीय नेत्यांचे लक्ष आता मतमोजणीकडे लागले आहे.