सणासुदीत साखरेचे दर घसरले; क्विंटलमागे २०० रुपयांची घट
पुणे : बाजारात साखरेची मागणी अपेक्षेप्रमाणे वाढलेली नसल्याने दरांवर दबाव निर्माण झाला आहे. मंगळवारी एस-३० ग्रेड साखरेचा घाऊक दर क्विंटलमागे सुमारे २०० रुपयांनी घसरून ४,८०० रुपयांपर्यंत आला. मुबलक कोट्यामुळे आगामी काळात दर आणखी कमी होण्याची शक्यता बाजारपेठेतील सूत्रांकडून व्यक्त केली जात आहे.
दरम्यान, साखर कारखान्यांनी सरकारने मंजूर केलेल्या कोट्यापेक्षा अधिक साखर विक्री केल्यास त्यांना साठा मर्यादेच्या उल्लंघनाबाबत सविस्तर खुलासा द्यावा लागणार आहे. संबंधित खुलासे १७ सप्टेंबर २०२६पर्यंत सादर करणे आवश्यक असल्याचे निर्देश देण्यात आले आहेत.
केंद्र सरकारने सप्टेंबर महिन्याच्या दुसऱ्या पंधरवड्यासाठी १३.५० लाख मेट्रिक टन साखरेचा कोटा जाहीर केला आहे. त्यामुळे सप्टेंबरसाठी साखरेचा एकूण कोटा २६.५० लाख मेट्रिक टनांवर पोहोचला आहे.
पहिल्या पंधरवड्यातील संपूर्ण कोटा विकता न आलेल्या कारखान्यांनाही न विकलेल्या साखरेचे प्रमाण आणि विक्री न होण्याची कारणे स्पष्ट करून खुलासा द्यावा लागणार आहे. तसेच मुदत संपलेल्या (लॅप्स्ड) कोट्याची साखर विकण्यासाठी पुढे मुदतवाढ दिली जाणार नसल्याचेही स्पष्ट करण्यात आले आहे.
