शॉर्टसर्किटमुळे तब्बल बारा एकर ऊस जळून खाक!

लोहा (जि. नांदेड) : पेंडूर येथे शॉर्टसर्किटमुळे लागलेल्या आगीत बारा एकर क्षेत्रावरील ऊस जळून खाक झाला. दुपारी तीन वाजण्याच्या सुमारास गट क्रमांक ७ मधील उसाला आग लागली. या घटनेत काढणीच्या टप्प्यावर आलेले पीक नष्ट झाल्याने संबंधित शेतकऱ्यांचे मोठे आर्थिक नुकसान झाले आहे.

शेतातील ऊस पेटल्यानंतर धुराचे लोट उठू लागले. आग लागल्याचे लक्षात येताच शेतकऱ्यांनी घटनास्थळी धाव घेतली. आग आटोक्यात आणण्यासाठी त्यांनी प्रयत्न केले; मात्र तोपर्यंत बारा एकरांतील ऊस आगीच्या भक्ष्यस्थानी पडला होता.

यंदा अतिवृष्टीमुळे पिकांचे आधीच मोठे नुकसान झाले आहे. पावसामुळे खरीप हंगामातील पिके संकटात सापडली असताना काढणीच्या टप्प्यावर असलेला ऊसही जळाल्याने बाधित शेतकऱ्यांच्या अडचणी वाढल्या आहेत. अतिवृष्टीपाठोपाठ आगीच्या घटनेने शेतकऱ्यांना आणखी आर्थिक फटका बसला आहे.

घटनेची माहिती मिळाल्यानंतर महसूल आणि कृषी विभागाच्या अधिकाऱ्यांनी घटनास्थळी भेट दिली. मंडळ अधिकारी, तलाठी आणि कृषी सहायक यांनी नुकसानग्रस्त क्षेत्राची पाहणी करून पंचनामा केला. त्यानंतर नुकसानीचा अहवाल तहसीलदारांकडे पाठविण्यात आला.